Forums-Beitrag

Ig ha letzt Weekend mi Polterabe gha u es isch ächt eifach GENIAU gsi! Mini TZ u mini Froue hei säch sooo müäh gä :)

Auso ig ha gwüsst, dassmr am Abe az Trucker&Country Festival göh, ha das so gwünscht… schüsch hani nüt gwüsst…

Ig ha am Samsti am 13.30 müesse in Münsige am Bahnhof si. Bi scho mega närvös gsi wüui nid ha gwüsst, wasmi erwartet..

Dert het mi mini TZ abghout u mir si ine Park gloffe wo üs auii erwartet hei :) mitemne Glas Champus u mitemne TShirt wo „Mein Name“ Chicks“ isch druffe gstange hei si mi erwartet :) ig ha es Tshirt becho wo druffe isch gstange „Wedding Chick“

När hei si mir gseit, dassmr iz gö ga Töpfere wüu mi GG u ig gad vor churzem es Huus hei kouft, wei si üs auii öpis mache für i Garte. Es isch so gmüedlech gsi u mir heis so guet gha zäme.. auii hei säch chli chöne lehre kenne u mir hei chli zyt gha zum zäme brichte…
Und vorauem, es si soooo tolli Sache drbi use cho… Schöni Sache wiä Röseli u Töpfli und luschtigi Sache wiä es Söili, Enteli und so wine HalloweenKürbiskopf wo de sicher mi GG fröid het ;) u ig ha es Tüürschiiudli gmacht mitem nöiie Name natürlech :)

Nachem töpfere simr gmüedlech dusse am zVieri ässe gsi..hei no besproche wär mit wäm de im Auto fahrt für uf Interlake u när isch ä Töff cho zfahre.. när hets gheisse, ig chöni iz mit däm mit :) soooo cool gsi :) es isch dr Götti vo mire TZ gsi u ig ha när hinge druf chöne u de simr uf Interlake gfahre.. So toll gsi diä Fahrt :)
Bevormr si los gfahre hani e Läderjagge und Helm becho..ha usgseh wine riese Kaste i dere Jagge :D u nä Plan wo dassi när mini Froue zInterlake ume finge..

Nach dere tolle Töffahrt hani när mini Froue gli mau gfunge u de isches witer gange…
Ig ha ä pinkige Cowboyhuet übercho… e riesigi grossi pinkigi Sunnebrille und e pinkige Pistolegurt mit pinkiger Wasserpistole (Föteli finget dir uf Facebook).
När hei si es chlises Leiterwägeli drbi ga mit chline Shots dinne woni ha müesse verchoufe.. muess säge, es isch rächt eifach gange wüu eigch dLüt uf mi zuä si cho :) hei mega Gäud gmacht u mit däm hani mir när dr ganz Abe chöne finanziere…

Dr Räscht vom Abe simr när gmüedlech im Westerndorf gsi, hei no chli tänzlet, si no ga es Konzert luege u de när im Zelt ga schlafe… mir hei zviert dert übernachtet, u dr räschte vo dä Froue isch Hei gange…

Am Sunntig womr erwachet si, si zwo Kollegine zrug cho vom WC u hei verzeut, si heige Type lehre kenne u mit dene abgmacht zum zMorge ässe… mini Begeisterig isch nid gad gross gsi (Morgenmuffel läst grüssen…)
Uf jedefau simr när richtig Zäut wos zMorge het gä u si dert ihne gloffe u dKollegin het sä scho vo witem gseh.. kommischi Type mit Kabutze u ig ha gar nid richtig gluegt wüui gar nid so ha möge…
Womr de bi dene si gseh hani plötzlech gschnall wär ja das isch… Nämlech mi GG u dMänner vo mine Froue :) sooo ä tolli überraschig :) u drzuä hei dMänner auii es Tshirt anne gah wo druffe isch gstange „Mein Name“ Cowboys“ :D ha meeega fröid gha :)
Mir hei de när auii zäme gmüedlech zmörgelet u si no chli dür zWesterndörfli u si de när nachem Mittag mau Hei zuä gange… Es isch ä ächt geniau gsi!


Hiä dr Bricht vo üsem Zivile
********************************************

Ä Tag vor üsere Zivile Trouig bini auso scho chli närvös gsi.. mini TZ hetmr de am Abe vorhär gschribe, ig söui mi de nid närve weni nid cha pfuse sonder diä letzte Stunde aus Frou XY (no mit ledigem Name) gniesse. Das hani de ou gmacht, wüu gschlafe hani nämlech nid guet.. Aber dank däm guete Tipp hani mi ou nid gnärvt ;-)

Ig bi de öpe am 07.00 Uhr ufgstange u bi de när uf diä 08.00 zum Coiffeur. Ig ha no Meches gmacht, dHaar chli gschnitte u när heimr Brautfrisur für de am Kirchleche Testet :-)
U när het si mir am Schluss de no ä mega schöni Frisur gmacht für am Zivile Hochzyt. Für mi isch dä Morge bim Coiffeur super gsi, bi schön abglänkt gsi u när ou nüme so närvös.. Mis Mami ischmr de no es wuuunderschöns Strüssli cho bringe u de heimr sogar no ä passendi Rose id Haar ta :-)

Am Mittag bini no zu mine Eltere öpis chlises ga ässe.. hunger hani zwar nid gha.. Ha nume dänkt, wiä wird de das am Kirchleche? :-/

Ig bi mir när ga parat mache, alege und schminke. Ha mi GG afa gfragt öb är eigch immer no nid närvös isch? U de heter de gmeint ka, mou iz scho afa chli.. ha scho dänkt göng nume mir so ;-) u när si üs üsi Trouzüge am 14.00 Uhr cho abhole. Si hei zAuto mega schön mit Blueme gschmückt ka u mir hei när hinger inne es Tablar gha mit Champus u Nüssli. Mega härzig :-) si hei säch mega müäh gäh :-)

Mir si när uf Thun zum Standesamt gfahre u uf diä 14.50 Uhr si de när diä räschtleche Lüt itroffe. Je üsi Eltere si drbi gsi, mini zwe Brüedsche mit Fründinne u mim Maa si Brüedsch.

dStandesbeamtin isch üs de när cho hole u si isch mir gad vo Afang ah mega sympathisch gsi :-) si isch auii ga grüesse u het chli gfragt wär wär isch u het säch vorgstellt. Mega ä Flotti u ufgstellti isches gsi. U ja när isches los gange mit dr Trouig.. ig bi so närvös gsi, cha gar nid wük säge um was dasses isch gange :-D Si het uf jedefall gseit, es isch wiä mitemne Diamant. Weme diä Ecke u Kante zfest abschlieft hetme schlussendlech nüme dä Stei/Mönsch wome mau het gha.. u ohni Ecke und Kante wäri ä Diamant/Mönsch ja när nüme zgliche..

När heimr müesse ufstah u si het zersch mi gfragt u ig ha Ja gseit. U när het si mi GG gfragt u är het ou Ja gseit u da si bi mir Träne gflosse.. äs isch sooo schön gsi dass är iz wük JA zu mir het gseit :-) sone mega schöne Momänt :-) dr schönst vom ganze Tag :-)

De hei mir no müesse ungerschribe. Mi Maa hetmr de no gseit, söu de mitem nöiie Name ;-) Ha ihm vorhär no gseit är söumrs de säge, dassi vor luter Ufregig nid so fausch ungerschribe ;-) dStandesbeamtin het de no es Gedicht über „Glück“ vorgläse u de si üs auii cho gratuliere… u de si no gad mau Träne gflosse.. Auii Froue hei ömu ou Träne i dä Auge gha.. ;-) vorallem mini TZ u mis Mami :-) ha gar nid richtig chöne merci säge für Gratulatione, so überwältiget vo dene Gfüu bini gsi…

Mir si när use gloffe u dusse hei es paar Kollege u mis Grosi gwartet :-) mir hei de bim Standesamt no agstosse u paar Föteli gmacht. Nachemne Zytli simr de witer u de het dusse uf üs ä Kutsche gwartet :-) ä mega Überraschig :-) u mir hei doch gar nüt erwartet! :-) mir si de ufgstige u si los gfahre..u de fahrt doch dä mitz dür zBälliz düre :-D für di wo Thun nid kenne, mitz dür dStadt düre :-D dLüt hei Gratulatione zuä grüeft u paari hei sogar afa klatsche :-D

Mir hei diä Kutschefahrt mega gnose.. hei dert eifach mau chli Zyt für üs zwöit gha :-) mega schön gsi! Womr bim Restaurant si acho, Parkhotel Gunte, het de üsi Familie u TZ dert gwartet u üs empfange. Mir hei super Wätter gha (was ja nid so sälbstverständlech isch das Jahr) u hei de im Garte am See zApèro gno.. isch mega gmüedlech gsi.. hei de dert ou no chli Fotos gmacht u chli zschöne Wätter gnosse :-)

Speter simr de inne ga zNacht ässe.. BaBouChi, isch öpis ähnlechs wiä Fondue Chinoise.. :-) suuper fein gsi :-) nachem zNacht simer üs no chli ga dFüess verträtte u chli ga verdoue..hei auii zviu gässe gha ;-) hei de nomau paar Fotos gmacht..zLiecht isch super gsi när..
Chli spetere heimr de no Dessert gno..ig ha gar nüme möge.. zum Glück het mi Maa no eis gno. Si hei nämlech zTeller mega schön Dekoriert gha mit üsne Näme druffe :-) mega härzig gsi :-)

Nachem Dessert hei üs üsi Trouzüge gseit mir söue mitcho u de simer use i Garte u füre a See u si hei dert mit Laterne äs Härzli gmacht gha..u mir si de när dert, nume mir zwöi“ ufnes Bänkli ghocket, hei dr See u diä schöne Lämpli gnosse u si eifach nume chli für üs gsi :-) so schön gsi u mega romantisch dert :-) eifach nume mir zwöi :-) super Idee gsi vo üsne TZ :-)

Nachemne Zytli si de auii angere ou no cho luege u de heimr üs de ufe Heiwäg gmacht..
Daheime acho het üs no ä witeri Überraschig erwartet. Üsi Stäge isch dekoriert gsi mit Lampions u a üsere Tüüre si ou no Plakat ghanget u so Fähndli mit „Just Married“ si ou no ghanget! Mega schön gsi :-)

Äs isch so ä wunderschöne Tag gsi! Üsi TZ u üsi Family hei säch sooo müäh gäh! U mir hei doch mit gar nütem grächnet am Zivile..


Hochzytsbricht
********************************************

So iz isches genau ä Wuche här woni mi Troummaa ha dörfe hürate :)
U drum isches iz Zyt mi Bricht zschribe..

Am Fritig hei mi GG u ig beidi Frei gha u hei no diversi sache müesse erledige..
Si no Getränk ga häre tuä i Ruum womr am Abe de hei gfyret.. Si no dr Ruum ga übernäh womr de zApero hei gmacht u hei geng öpe ume chli dr Wätterbricht agluegt.. dä het säch im verlouf vor Wuche immer chli verbesseret :-)
Am Friti Abe bini de no ga dHaar ilege zum Coiffeur u de när Hei gmüedlech no chli ga Fernseh luege mit mim GG u de simr de ou relativ früäh ga lige.. Ig ha eigch rächt guet pfuset, ussert dassi am Morge am vieri bi wach gsi.. ha de aber nomau chöne ifpuse u bis de 05.30 dr Wecker het glüte.

Ig ha tiptop möge ufstah :) bi ga dusche, hami agleit u bi de gli mau gange.. ha mis Mami u ä Fründin abgholt u mir si zum Coiffeur gfahre.. dert hani mi när la frisiere u dHaar si super gsi vom ilege :) Mis Mami isch ou frisiert worde u üsi Fründin het üs zMorgebrötli gstriche u ig ha wük hunger gha u möge ässe u zwöi Kaffi trunke :) äs isch mega gmüedlech gsi, närvös bini eigch nid gsi..
Wo dFrisur isch fertig gsi, simer när witer zum schminke..dert het när mini TZ gwartet wo scho gschminkt isch gsi.. ig bi de ou gschmink worde (isch ä gueti Fründin vo mir) u si isch so richtig ruhig gsi, isch super gsi bi ihre :-)
Nachem schminke simr när zu mine Eltere Hei wo ig mi när ha agleit.. Ig ha mi sooo uf mis Chleid gfröit :-) ändlech, ändlech hanis chöne alege :-) u woni mi när zerste mau i Vollmontur im Spiuegu ha gseh, hani mega fröiid gha :-)

Mi jünger Brüedsch het mi u mini TZ när zu üsere Fotolocation (ä Park am Thunersee) gfahre wo när dr Fotograf uf üs gwartet het.. är het när gseit dass mi GG am See vore isch u de simr füre gloffe.. mi GG u ig si üs när ire wunderschöne Baum-Allee entgäge gloffe.. läck i ha mi dert gfüut wiä früsch verliebt mit Schmätterlinge im Buch u mega närvös ;) bi froh gsi woni ändlech bi ihm bi acho :-) u är het sooo super usgseh :-) ä dunkle Azug u ä helli Kravatte passend zu mim Chleid.. u mitemne Bärtli (woni mega sexy finge, viu besser aus ganz rasiert) :)
Är het mi de vo zoberst bis zungerst agluegt u het gfunge vorallem ds Oberteil vom Chleid sigi ja mega schön mit dene Stickereie :-) het ihm gloub wük guet gfaue :)
Mir hei när gmüedlech Zyt gha zum fötele u hei ou meeega Glück gha mitem Wätter! So super gsi! Nid zheiss u glich no chli Wolke u vorallem ke Räge ;)

Nachem Fötele simer de zu mine Eltere no öpis chlis ga zMittag ässe u de öpe 13.15 gfahre für zur Kiuche.. dert simr imne Näberuum ga warte u när isch bi mir los gange mit Närvös.. mir isch schlächt worde u ha eiskalt übercho.. :-/ hami gar nüme wohl gfüut..aber ha gwüsst, das geit ja de ume verbi.. när isch mis Mami mit üsne Bluememeiteli cho wo soo härzlig hei usgseh u ou scho närvös si gsi u de isch no mi Papi cho.. zum Schluss de dr Pfarrer.. mir si när los gloffe zur Kiuche übere.. zersch isch mi GG mit üsem Pfarrer ine gloffe när üsi TZ u när Bluememeiteli vor mir u mim Papi. Woni id Kiuche bi gloffe hani dLüt gar nid richtig chöne aluege, schüsch hätti no müesse gränne wüu teu scho Träne die Auge hei gha ;)

Woni vore bi acho simr abghocket u ig ha mau dLüt chöne aluege u bi ume chli ruhiger gsi :)
Aus ersts hei mir de chöne zäme ä Kerze azünde (womr de speter hei übercho) u när het dr Pfarrer gred u är hets eifach sooo super gmacht! Ig kenne ihn scho lang wüui aube mit ihm zäme ha Jungschi und Lager gleitet u drum isches für mi klar gsi dassi gärn ihn hätti aus Pfarrer… u är het dTrouig so mega persönlech gmacht u isch ou uf zThema Reise igang wo mir aus Motto vo üsem Hochzyt hei gha.. so super gsi! Mir hei de ou no 2 Lieder zäme gsunge u mi Brüedsch het mit sire Band zwöi Lieder gspiut.
Nachem Ja-Wort hei üs dBluememeiteli dRinge bracht u mir hei dRinge ustuuschet üs küsst u dLüt hei klatschet :-) mega schön gsi.. u när isch für mi eine vo dä schönste Momänte vo däm Tag cho.. Mini Brüedsche hei zäme äs Lied für üs gschribe wo när mim jüngere Brüedsch sini Band für üs het gspiut.. mim Maa u mir si eifach beidne nume no Träne abegloffe.. äs isch sooo schön u persönlech gsi. U das äxtra für üs!! Mi Brüedsch het zum Glück alles gfiumet u de chöimr de das no mau luege.. :) Nachdr Trouig si mir de usegloffe u dusse si mim Maa sini Unihockykollege u mini Arbeitskollege spalier gstange :-) super gsi! Mir si de diräkt zur Aperolocation wo üs när auii Lüt gratuliert hei..

Äs isch ä super gmüedlechi Stimmi gsi wüu mir ou dank däm super Wätter hei chöne dusse si.. u zApero isch ächt super gsi! Gässe hani zwar säuber chum, aber usgseh hets sooo toll :) Äs Kollegepäärli het no sone Zauberer organisiert wo dLüt het ungerhaute am Apero u gloub super isch acho.. für diä chline Ching het är när so Sache us Ballön gmacht ka :) isch ä cooli Idee gsi..

Mir hei de no Gruppefotos gmacht u das isch no rächt zackig gange zum Glück :) u ig ha de no dr Brautstruss gworfe :) ä gueti Fründin vo mir hetnä gfange u ig ha am Morge no gseit ka ig wet am liebste dass Si oder ä angeri Fründin vo mir nä fasset ;) isch luschtig gsi :)

Nachem Apero si mir när vomne Rolls Royce abholte worde :) geniau gsi! Läck isch das gmüedlech gsi dert hinger inne :) mir hei när es Fährtli gmacht, öpe 1 Stund lang, u heis eifach nume gnosse chli für üs zsii :)

Womr bir Abelocation si acho hei auii scho uf üs gwartet :) dMänner hei de no chli zAuto gneuer agluegt u ig ha no zyt gha mau uf WC zga ;) isch ömu fei guet gange (mit Hiuf vor TZ) :)

När heimr es mega tolls Gschänk becho :) u zwar es Bild mit Fingerabdrück vo aune.. U das Bild isch äxtra für üs gmacht worde… Isch ä Flüger druffe mit Gepäckwage u Bussli u so vore dranne.. U dLüt hei när bi dä Persone mit ihrem Fingerabdruck chöne zGsicht mache :) gseht super us :)

Mir si när id Location gfüuhrt worde wos när es „Checking“ het gäh mit üsne Tischkärtli-Köfferli… u dert inne si bi mir no gad mau Träne gflosse… ä Fründin vo üs het diä ganzi Ruumdeko übernoh u es isch soooo schön gsi!! Mit wunderschöne SunnebluemeStrüüs uf dä Tische u Kerzli u ufdr Site mit Fotos vo üsne Reise dekoriert.. sooo schön :) Jede Tisch isch mitemne Land bezeichnet gsi u so hei när dLüt uf dä Kofferetickete ihre Tisch gfunge.. isch gloub no guet acho :) Mir hei ou äs „World-Candy-Buffet“ gha mit Süessigkeite vo verschiedene Länder u när diä jewilige Fahne drzuä. Vo Österreich zB. Mozartchugle..

Mir hei när auii Lüt churz vorgstellt (wiä si zu üs stöh u u wasmr mit ihne scho für Reise hei ungerno) u de hets zNacht gäh :) Salatbuffet mit Kartoffelgratin und drzuä verschidnigs Fleisch vom Grill :) äs isch suuuper gsi! Nume hani leider nid so hunger gha..

Nachem ässe heimr chli zyt gah üs mit dä Lüt chli zungerhaute..
Speter hei de üsi Vättere ä Fotoshow gmacht mit Kinderfotos vo üs wo si de när geng chli öpis drzuä hei verzeut :) isch mega luschtig gsi! Am Schluss hei si üs beidi idr jewilige Familie Willkomme gheisse :) mega schön gsi :)
När hets no zklassische Fragespieli gäh mit Schuäh ufe häbe :) gloub mir si gar nid so schlächt gsi :) isch uf jedefau luschtig gsi :)

So um diä 11i isch de Turte cho wo mega schön het usgseh u super isch gsi :) Eini mit Truffschoggi, Waldbeeri und Joghurt-Himmbeeri :) Mmm fein gsi :)
Ca. am 12i isch de no üse Hochzytstanz cho.. mir hei ke Tanzkurs gha u si meh chli hin-und här gschauklet.. ;) u mir hei üs spontan für zLied „I see fire“ vom Ed Sheeran umentschiede wüu mir das beidi sooo schön finge.. dr Text isch zwar völlig unpassend, aber isch haut chli üses Lied :)

Nach üsem Tanz si de när gad paari cho tanze.. Eher chli diä Eutere u hei de üs junge gad chli zeigt wiäs gäng :D nenei, nid gad .. aber isch wük tolli Stimmig gsi :)
dLüt si de chli verteilt langsam ufe Heiwäg u mir si de schlussändlech öpe 05.15 ko im Bett gsi..

äs isch für üs wük ä wunderschöne Tag gsi! Üsi Familie u Fründä hei säch sooo müäh gäh dasses für üs wük perfekt isch gsi! :) i dänke gärn zrug u fröiie mi uf dFöteli u zVideo...u natürlech uf üsi Flittis wo no vor üs liege u mir de mitti Oktober göh :)

von LaMariee
(Dieser Beitrag wurde als Ersteintrag aus dem bisherigen Forum übertragen)