Hey Mädels

Ich mäld mich au wieder mal... Leider isch sit mim letschte Bitrag nöd alles so gloffe, wie erhofft. Aber s Hochsig isch wunderschön gsi.

Fotis zeigi dänn mal, wän mer die vo de Fotografin händ (sie hät nämli voll umdisponiert für eus, so dass mir jetzt vo eusem richtige Hochsig Fotis vo ihre händ und nöd erscht vom Fäscht im April). Aber ich tuen mal chli verzelle.

Am Morge am 8i hani bi mir (also, no bi de Eltere, jetzt wohni ja nüme det) dihei abgmacht mit minere Trauzügin, zwei Coiffeuse und enere Visagistin zum eus ufhübsche. D Visagistin isch eini vo de beschte Kollegine vo mim einte Brüeder und di eint Coiffeuse d Fründin vo eim vo de beschte Kollege vo mim andere Brüeder. So isch es grad nomal bizli persönlicher gsi, wänn ich au beidi nöd so guet känne. Ich han kei Probefrisur und Make Up gha, aber bin mega zfride gsi mit em Resultat. D Visagistin hät mi sogar hauptsächlich mit mine eigete Sache gschminkt (v.a. wäg em Lidschatte, dassi mir da nüt vo öper anderem uffange a Bakterie und so, mini Auge sind rächt empfindlich) und mir Komplimänt gmacht, dassi mega guet wüssi, weli Produkt (Farbe und so) guet sind für mich. Isch grad no en Ufsteller meh gsi.
Ich han mit beidne eifach vorher gmailt und gseit, wasi öppe wett. D Coiffeuse hät no anere Puppe e Probefrisur gmacht und dänn hämmer vo dere chöne us gah.

Isch mega lässig gsi, das dihei chöne z mache. De Grund isch zwar vor allem gsi, dassi nöd fit bin. Aber isch im Fall würklich no öpis kuuls, chans empfehle. Aber mer hät dänn natürlich nöd en grosse Spiegel vor sich und chan luege, dass alles richtig lauft. So hät halt alles Vor- und Nachteil.

S isch no es mega Chäferfäscht bi eus gsi, wil mini Eltere und de eint Brüeder und nacher immer meh Lüt au no ume gsi sind. Isch luschtig gsi.

Ich bin mit Frisur und Make Up meeega früeh scho parat gsi. No vor em 09.30, obwohli erst am 10.10 öpe los han müesse zum fötele. Natürlich isch es aber dänn glich no en Stress worde.
Drum Tipp: Unterschetzed d Ziit nöd, wo's brucht, zum s Chleid s erscht Mal azlegge. Nacher isch immer ruckzuck gange (ich muess es für ufs WC abzieh), aber s erste Mal hämmer no d Hänkel müse abeneie und dänn d Schleppe ufe hänke und d Fäde a dene Chnöpf weg neh (sie händ so verschiede farbigi Fäde dra ta, demit mer bim erste Mal en Orientierig hät, wele Hake zu welem Chnopf muess)... Und so hani dänn min Maa doch zimli lang warte lah a de Fotolocation. *gg*

Min Brüeder hät mich imene soooo kuule Oldtimer an See gfahre. Per Zuefall häter au no super zu eusne Farbe passt. Isch s Auto vo de Eltere vo eim vo sine beschte Kollege (haha, ich han mega vill Kollege vo mine Brüedere mobilisiert für mis Hochsig ). En VW-Chäfer, sooo herzig.

Mir händ so Semiglück gha mit em Wätter. S isch ja um de 15. März immer schön gsi, usser genau dänn rächt chalt und bewölkt. Aber s hät nöd grägnet, drum hämmer chöne verusse fötele. Min Maa hät am See bi eus i de Nöchi (det bini scho als chline Chnopf drin gschwumme) uf emene Stäg gwartet und mir händ sones First Look Shooting gmacht.
Haha, zum Glück isch käne vo eus vom Stäg gheit... Isch ja alles scho passiert. (Zum Bispil em Brüeder vom TZ vo mim Maa - also, irgendwas i dere Art, voll is Wasser gheit vor em Hochsig).

S Fötele isch mega kuul gsi. Au de First Look, machts nomal bizli spezieller. So isch es doch en spezielle Momänt, wänn mer sich s erste Mal gseht, au wänn mer scho vor de Trauig gaht go fötele und sich drum nöd erst dänn s erst Mal gseht.

Hach, Mädels, ich bin scho sooo gspannt uf d Fotis!

D Andrea hät ja dänn no en Second Shooter mitgno, was sie glaub bi paarne vo eu au wird mache. Die isch also au ganz e liebi, chönd eu freue! Mir händs u guet und au luschtig gha.

Nacher simmer wieder zu mine Eltere hei, no öpis go ässe und dänn isch min Maa au scho weg zu de Chile gfahre worde - wieder vo mim Brüeder im Oldtimer.

Ich bin dänn bizli spöter mit mim Vatter gfahre und dänn isch es au scho glii los gange. (Und min Bitrag isch scho so mega lang, bevor ich überhaupt zu de Trauig chum... oops! )

Natüüüürlich isch dänn no öpis schief gange. Eigetli zwei Sache, aber isch easy. Einersiits isch mis Chleid z lang gsi für de Teppichbode i de Chile. Zum Glück hanis gmerkt, bevor ich vorne druf tramped und umgheit bin. Dänn hanis halt chli müesse lupfe vorne. Und d Organistin hät bizli z früeh afange spile, wil sie wohl de Sigrist missverstande hät. Aber easy, händ eus dänn eifach beeilt mit fertig büschele und inelaufe. *gg*

Aber de Izug isch scho en spezielle Momänt, natürlich au für min Papi, er hät sich mega gfreut. Mir händ de Hochsigsmarsch vom Mendelssohn gwählt. Mit dem hämmer damals scho eusi Verlobig de Eltere und Brüedere jewils akündigt. (Händ sones Musigdösli kauft, wo de spilt, und sie händ dänn sälber müesse druf cho, was los isch.)

So, und jetzt tuen ich mal unterbräche.

En schöne Nami no!

• Zitieren

Oh Fara, gratuliere jetzt schomal vo ganzem Herze! Mier warted ez alli ganz ungeduldig uf de Reste! Und uf d Föteli bini aso mega gspannt. Tönt wahnsinnig schön mit dem Steg. Hach

@me
Han grad en Schleier bstellt, nachdem ich hüt Morge im Forum en Bitrag gseh ha (danke MiMa ) Zahle um die 35.- mit Versand, also voll easy, selbscht wenni denn enttüscht wirde :)

• Zitieren

Fara
Gratulation! Bi gspannt uff d Fotis :)

Sue87:
Mir gefallt s erschte am Beschte, sich so Bits "weniger isch mehr" ;-) Wo bstellsch Dr die Accessoires?

• Zitieren

Janedoe
wooow une schöni Blueme.....
Wissi Stoffblueme hani ebe scho bim zivile im Haar gha meg dem wetti öpis anders

Talu
ds erschte isch vo www.etsy.com und di andere hani gseh bi www.glitzysecrets.com und bi www.bhldn.com

• Zitieren

Sue87: glitzy secrets het sooooo schöni sache!!! hesch du döt scho mol was bstellt? funktionierts iwandfrei für ind schwiiz? sind aber scho no rächti priis für dass es kei silber isch

• Zitieren

Sue
Ja denn chasch dier am grosse Tag scho mal nochli was anders id Haar stecke, findi au :)

kleinefeder
Klar, tue denn mini Erfahrige mit eu ustuusche :D

MiMa
Ich han en Schleier mit Spitze agha woni mis Chleid usgsuecht ha und hane zerscht nöd so toll gfunde, aber eigentli nur will mini Schwöschter chli dNase grümpft hed... Lah mich amigs eifach liecht beiflusse will ich halt allne wett gfalle Ich selber ha de Schleier uh schön gfunde und inzwüsche hani au akzeptiert, das sie und ich total verschiedni Gschmäcker hend und ich eifach uf mis Gfühl muess/will lose und das seit definitiv JA
Han zerscht de wo du postet hesch welle neh aber de ander gfalltmer wege de breitere Spitze echli besser :) Und ich han en andere Shop gwählt, eifach als Tipp... de Shop uf dim Link verlangt 19.50Euro Porto

Zuletzt bearbeitet am 26.03.14 17:24

• Zitieren