@schagge: ah ok... I dänke das isch scho ok mit däm Termin. Bi mir het sie gester ou no 2 chlini Sache müesse verbessere und das isch ä Sach vo 15 Minute gsi. I dänke sie säge eifach, dass me gnue zyt irächnet und nid meint me chönn eifach schnäu ine ga ds Chleid abhole. Bi im Ganze scho fasch ei Stung det gsi.
Mega doof wäge däm Personeunfall... Das hät mi ou gnärvt!

@taeboyana: Fingi guet dass gad sälber mit de Behörde luegsch. Die chöi dir sicher am bestä Uskunft gäh. Wär ja würklech mega doof wenn dä Nachbar när d Bulle laht la cho. Närve mi dermasse ab Lüt wo a irgendwelchnä exponierte Lage göh gah wohne wöus haut schön isch und sich när beschwäre übere "Lärm". Bi üs wohne ou Lüt direkt überem Resti. D Cheffin het när nur gseit gha, sie fröie sich immer über nä Fläsche Wy, aber düe nie blöd...

@lillian: Viel Spass ufem ZSA!!!

@littlefoot: Haha, du hesch mi Tagesplan im Griff! Bi no am Schaffe bis am Mittag u när gangi ufm Heiwäg gad schnäll id Ikea. När wotti no chli bastle am Nami... Ah super het sich das klärt mitem Rest! Findes cool chöit dir no mal verbi gah vorhär wenn dir de o wüsst wie ds wätter wird... De chöit dir alles no mal genau aluege und bespräche.

• Zitieren

@schagge: han gad au chöne profitiere vo dinere frog..gang jo morn s kleid go abstecke und wird denn au no müese en Termin abmache zums abhole bzw. s letscht mol vorem hochziit drii schlüfe :-)


denn hani widermol ä frog wo ihr mir sicher chönd wiiterhelfe :-)
ich han mir überleit was mer fürs Bruutpaar-Shooting am grosse Tag chönnt für Acessoires mitneh damits nöd so stieri und langwiiligi fottis git. wa mir uuh guet gfallt sind diä übergrosse ballön..tue mol no es bild ahenke vo dem.
hend ihr susch no Ideeä wiä mer s Shooting echli chönnti ufpeppe? han denkt evtl. nimmi denn au no d'Photobooth-Artikel mit woni jo no sötti bechoo vo dä Weddingbee :-)

bi gspannt zläse wa ihr so für Ideeä hend :-)

Zuletzt bearbeitet am 17.06.14 11:13

• Zitieren

@ittlefoot: jo gell ich finds au herzig. und diä ballön gits i allne farbe, würs au no schön finde in Türkis, blau usw. mol luege.

bisch scho nervös? goht jo nümä lang etz bi diir :-)

• Zitieren

@Fanny: Jaaa, Föteli!

Findi kuuli Idee mit dene Ballön. Mir händ nöd gross Accessoires debi gha. Euses Merci-Schild für Dankeskärtli hämmer prompt vergässe mitneh. *gg* Händ dänn nacher no Fotis gmacht demit, aber mit weniger schöner Kulisse. Werded vilich glich nöd die neh. (Jaaa, mir sötted d Chärtli ändlich mal mache.)

Aber ein Tipp hani no: Mir händ e Decki debi gha (gnauer hät sie d Fotografin mitgno). Das isch no cool, dänn chönder zum Bispil uf es Bänkli sitze ohni Angst ha, irgendwas dräckig z mache a eune schöne Outfits.

Ah, doch... En Schirm hämmer gha. Hät no schöni Fotis geh.

@janedoe: Ich han da was Fotografischs entdeckt... Mega schön!

• Zitieren

So mini Liebe, da folgt min Bricht, so wien ich mich kenne wird de eelends lang, aber ich chan mich eifach ned churz fasse, sorry.

Voreweg nur e chlini Weisheit vonere früsch verhüratete Frau: lönd üch durch all die Chlinigkeite bide Vorbereitig ned so stresse, die sind a dem Tag so völlig unbedüdend. Es git den eifach nume üch zwei und all die liebe Lüt um üch ume.

Aaalso, am Fritig hemer dihei alles i Chiste packt, schön sortiert nach Chile, Saaldekoration, mini Eltere und Hotel. Über de Mittag simer den no zäme is Crossfit und hend üs nachher uf de Weg zu mine Schwigereltere gmacht. Uf em Weg bini den grad no schnell bide Janedoe verbi go de Forumsschirm hole. Bisch also uuu e lässigi Frau und ich hoff mir schaffeds mal uf e Kaffi oder so. Denn hani min GG bi mine Eltere abgliefered (haha, das tönt als wer er es Päckli) und bin bide Floristin verbi go d Blueme hole, wo mini Sis i ihri Haar ta het. Sie hend mer den grad no min Brutstruss und d Bluemeständer für d Chile zeigt. Wow, ich bin scho es ersts mal hin und weg gsi, es het sooo schön usgseh, genau so wien ich s welle han. Ich bin denn zu mine Eltere hei. Han den no chli öppis gesse und bi mit mim Mami go d Kapelle dekoriere. Han den gmerkt, dasi die ganz Dekoration vom Forum han. D Schleife hani einere abkauft und sie hend scho ohni Blueme u schön usgseh und d Hussene vode Taeboyana hend üsi Stüehl meega edel gmacht (nomal es riise Dankeschön). De Pfarrer isch au no schnell verbi cho und mir hend biz pläuderled (isch en Kolleg vo mir) und no letschti Sache für de Samstig klärt. Nachher bini mit mim Mami go e Hugo trinke, den hemer mis Gotti am Bahnhof abgholt und sind den zu mine Eltere hei. Gli druf abe isch den au no d Fründin cho, wo am Samstig s Makeup vo mim Mami und Gotti gmacht het. Mir hend den no zäme mit minere Schwöster e gmüetliche Fraueabig mit Fuessball und Prosecco gmacht und ich bin den öppe am 12i is Bett. Han erstunlich guet chöne ischlafe, aber am halbi 4i bini plötzlich hellwach im Bett glege. Han de Wetter bricht den schnell nomal agluegt und er het tatsächlich kei Gwitter meh gha, so dasi mega froh gsi bin, das mer üs für d Schönwetterlocation für de Apero entschiede hend, obwohls am Fritig no unsicher gsi isch. Irgendwenn hets mi so gnervt, dasi ned han chönne schlafe, dasi id Stube abe ufs Sofa bin und det hani den sofort chönne ischlafe. Bin den am 6i schnell wach worde will mis Mami go jogge isch, aber han den nomal chönne schlafe und bin erst richtig wach worde, wo sie am 7ni wieder zrugg cho isch. Mittlerwile isch au min Daddy ufgstande und will ich erst am 8i bim Coiffeur han müesse si, bini ganz spontan no schnell mit mim Daddy mit em Velo an See gfahre und go bädele. De Moment isch so schön gsi, es isch no alles so ruhig gsi und s Wasser so erfrüschend. Min Daddy isch den no go jogge und ich bin zrugg und mit minere Fründin uf die 8i zum Coiffeur. Ich han d Frisur vore nomal gänderet (e Mittelscheitel, anstatt alles grad hindere) und bin den suuuuper z fride gsi mitere. Am halbi 10i simer den wieder bi mine Eltere dihei gsi, wo scho die ander Fründin wo mis und minere Sis ihres Makeup gmacht het, cho isch und mini Sis am schminke gsi isch. Mir hend den no chli öppis z mörgeled. Uf die viertel ab 10ni isch den de Fotograf cho und mis Makeup isch ade Reihe gsi. Mir hends bi mine Eltere verusse gmacht, isch echt super gsi. I dere Zit isch soo viel gloffe, mis Mami und Gotti sind au gschminkt worde, min Brüeder isch mit sinere Fründin verbicho, d Kollegin wo d Blueme macht, het mer de Brutstruss und de Astecker für min Daddy und s Armband für mis Mami bracht und d Söhn vo mim Gotti sind au verbi cho. En anderi Brut het de ganzi Rumel villicht gstört, aber ich hans voll gnosse. Es isch bi üs dihei irgendwie immer so zue und her gange, drum het das für mich irgendwie chli Normalität bedüdet. So geg die 12i isch den mis Makeup fertig gsi und de Fotograf isch zu mim GG is Hotel, ich han den minere Schwöster no d Frisur gmacht und chli öppis gässe. Bin irgenwie immer noni würklich nervös gsi. Am viertel vor 1 hemer den d Stube für all usser mis Mami, mini Sis und min Daddy abgsperrt. Dert bini s erst mal chli nervös worde, aber meh, will no niemer vo all dene Lüt um mich ume schön agleit gsi isch.

• Zitieren

I dere Zit hend mir Paarföteli gmacht. Ich seg üch, üse Fotograf isch de absoluti Hammer gsi. Er het üs z erscht eifach 5 Minute für üs gä. Mir sind den nomal id Kapelle ineghocket und hend eifach nomal alles uf üs wirke la. Den isch de Fotograf mit sinere Frau (mim GG sinere Cousine) cho und mir hend uu fridlich Föteli gmacht. Mir sind beid soo entspannt gsi und es isch so schön gsi, es paar moment für üs z ha (de Fotograf hemer Phasewis gar ned wahr gna). Mir sind den sogar no biz z früeh fertig gsi und hend no schnell uf üses Hotelzimmer chönne. Min GG het mer den grad no ghulfe uf s WC z gah, isch also ned sone grossi Hexerei gsi, obwohl mis Chleid ja würklich voluminös gsi isch. Üse TM het üs den in Saal gholt und womer ine cho sind. Isch es dunkel gsi und all Gäst sind mit Wundercherzli Spalier gstande. En wiitere Hüenerhut moment. Mir sind den abgsesse und min Schwiegervater het u e schöni Red ghalte und den au mis Mami. Ihri Wort sind sooo schön gsi, sie hed ja immer Müeh gha, dass ich de Name vo mim GG agnah han und das ich mich vo mim Vater id Chile füehre lah han. (Sie isch sehr emanzipiert, aber wenn ich so wie sie ufgwachse wär, wäri glaub au so wie sie), sie hed den erchlärt, dass sie nachdem mir letschti nomal drüber gredt hend, mini Beweggründ verstah chan und das ganze jetzt sehr guet gfindet. Das het mer echt viel bedüted. Und scho isch d Vorspis cho, während de Vorspis sind uf de Linwand Chinderföteli vo mir und vo mim GG cho, isch glaub en super Gspröchsstoff gsi. Nachher het mini Fründin woni scho sit Baby kenne s Du oder Ich Spiel gmacht, isch echt lustig gsi und mir hend uu viel überistimmige gha. Den het mim GG sini Familie alles so chlini Sportspiele vorbereitet gha, womer hend müesse bewise, wie guet mir zäme chönd spiele und d Lüt hend den bi jedem Spiel abgstumme wie guet mir gsi sind. Isch echt au uu lustig gsi. Zwüsched dure bini immer wieder bi allne chli verbi gange go chli rede. Und den isch au scho de Hauptgang cho. Es isch soo fein gsi, vor allem vode Sauce hend all gschwärmt. Nach em Hauptgang hed mini Familie es IQ (min Vorname-Quiz) App vorgstellt. Läck das isch so lustig gsi. Sie hend erchlärt, dass das es App sigi, wo sie entwickled hegged und womer Bit-Coins chöng verdiene (Schafböck, e Spezialität vo Einsiedle), wemer e Frag richtig beantwortet het. Und nachher cha mer sind Score uf FB veröffentliche. D Lüt sind dezue animiert worde die entsprechende Lut z mache, wenn e Frag richtig oder falsch beantwortet worde isch. Den het min GG amigs Frage über mich müesse beantworte, er het 3 Antwortmöglichkeite gha. Und jedes mal, wenn er richtig beantwortet het, hets en Schafbock ine grossi Vase gä. Wo die den voll gi isch, isch de score uf FB „veröffentlicht“ worde. Das isch so gange, dass sie plötzlich e Fahne mit eme Föteli vo üs zwei gha hend und mir die den hend müesse hebe und d Schafböck det dri gleert worde sind. Den hemer müese im Saal umelaufe und jede Gast het sich en Schafbock chönne nä. Isch echt cool gsi und het grad passed, will s ja churz vor em Dessert gsi isch.

• Zitieren