Mir händ euse Tag au hinder eus. S’isch MEGA gsii…

Am Samstig morge han ich müesse am 06.15 ufstah. Mich het fascht de Schlag troffe: Rege ond ganz dunkli Rägewolche sowiit mer gseht. Na ja, han grad kei Ziit gha zom mir gross Gedanke z’mache sondern bin losdüset. Mini Coiffuse het mer in 2.5 h en super Frisur ond es tolls Make-up anezauberet ond wo ich weder use cho bin, hani gmerkt, dass sich d’Wolche scho fast verzoge händ.

Weder dihei bi mine Dame händs mer gholfe, mit mim Brutchleid, mir händ no churz agstosse ond denn isch es im losgange Richtig Kapelle. Mann, ich bin glaubs sälte so nervös gsii ,wie det. Mis Herz het grased ond mini Trauzügin het mir die ganz Ziit beruhigend zuegred. Gnützt het’s ned vill. Mir isch es erscht weder guet gange, wo ich of d’Chile zueglaufe bin ond ich vo mim Papi ond em Pfarrer erwartet worde bin. No eis, zwei beruhigendi Wort ond los isch es gange… Ich han mich bim i d’Chile inelaufe richtig a mim Papi festklammeret ond han ussert mim strahlende Maa ond es paar Rauner ned vill meh mitöbercho. Chönt euch also nüm säge, wer alles i de Chile gsii isch ond wer wo ghocket isch. Egal, für das gits Föteli.

Euse Pfarrer het en superschöni Trauuig gmacht. Dezue händ als 1. Überraschig en Sängerin ond en Pianist de musikalisch Teil übernoh. Ich han mich eigentlich rächt im Griff gha, han eifach d’Hand vo mim Maa ghebt ond im Pfarrer zueglost. Aber wo d’Musig agfange het spiele, sind mer d’Träne nur so abegloffe. So wunderschön isch es gsii!! Au euse Trauspruch hani chönne säge, aber fraget mich ned, was min Maa gseid het, ich han mich vill z’fest müesse konzentriere, dass ich ned afange brüele… S’Highlight isch gsii, wo mini Trauzüügin i de Chile es Text für eus vorgläse het. S’isch eigentlich meh wie en Brief a mich gsii, i dem sie üs gseid het, wie vill mir ihre bedüütet ond sie eus nor s’allerbesti wünscht. Mini Träne sind nor so kulleret…

Mir sind denn zur Chile us ond sind mega überrascht gsii, wie vill Lüüt Spalier gstande sind. Oh, ich säg euch, die Gratulatione händs also au nochli in sich gah. Han gmeint, wenn ich d’Chile dore han, denn wär’s das mit Tränli… Tja, jetzt weiss ich’s besser. S’isch sooo schön gsii, wie sich d’Lüüt mit eus gfreud händ, dass ich sicher bi jedere 5. Person han müesse Tränli wegwüsche – ond es sind doch es paar Lüüt gsii…

Nach em gratuliere händ mir es paar Gruppeföteli gmacht ond denn isch es denn scho weder losgange. Mir sind mit eme alte GM-Cabrio (2. Überraschig vo de Trauzüüge) zom Föteliplatz ond denn of de Berg chauffiert worde. Det hämmer s’erscht mal so richtig mit euse Gäst chönne plaudere ond natürlich chli öppis g’ässe. Denn händs eus s’erst mal testet. Mir händ müesse of zwei Stüel mit em Rugge zonenand Platz neh ond bi verschiedene Frage müsse mit ehre Bierfläsche (für min Maa) resp. Salatbsteck (für mich) azeige, of wer das zuetriffe (z.B. Wer isch de besser Autofahrer, wer isch sturer etc.). De Gwünn isch denn erscht spöter bekannt worde.

• Zitieren

Ich han gar noni erwähnt, dass s’Wätter bis jetzt super gsii sich. S’isch zwar chli bedeckt gsii, aber öppedie hämmer es paar Sunnestrahle becho. Somit hämmer ned chalt gha ond au ganz sicher ned müesse schwitze.

Am 5i sind mer denn wiiter zo de Abendlocation. Det acho, het die nächst Überraschig of eus gwartet. Eusi Gäst händ sich in zwei Reihe ufgstellt. Jedes Päärli het en wiise Stei i de Hand gha, wo es Stichwort ond ihre Name igfräset gsii sind. Mir händ denn chönne vom eine zom andere gah ond sie händ eus gseid, was sie eus wünschet. Z.B. Stichwort Schmetterling: Dass mir i eusere Beziehig immer weder s’Gfühl vo de Schmetterling im Buch dörfet erläbe. Oh, bi mir sind scho weder d’Träne gflosse, es isch scho mega schön gsii.

Jetzt hani scho so vill gschriebe, aber s’beste chont erscht no: Am Abig händ eusi Familie ond Gäst super vill Öberraschige für eus parat gha, wo’s immer schön z’wüschet de Gäng iplanet händ. Mini Schwö het en uh lässigi Hochziitsziitig gmacht, denn hämmer dörfe verusse mit Dartpfiili Ballön abeschüsse, wo’s Guetschiin, was eusi Gäst für eus machet (Rasemähe, z’Nacht, wandere etc) drin gha het. Das isch übrigens de Gwünn vo dem Überiistimmigsspiel vom Namittag gsii. Mir händ so vill Ballön wie Öberistimmige dörfe abeschüsse.

Denn het mini Familie en „Grichtsversammlig“ inszeniert. Ich bin s’Opfer, min Maa de Aklagti gsii. Min Götti het d’Frage gstellt ond de wiiblich Teil vo minere Familie het für mich, de männlich für min Maa immer in Liedform g’antwortet. Isch chli schwierig z’erkläre, ich versuechs aber gliich mal: „Angeklagter, wie war deine Einstellung zu den Frauen bevor du deine Frau kennen gelernt hast?“
Denn händ d’Manne gsohne: „Ane geht noch, ane geht noch leicht, ane geht noch, ane geht oll`weil...“ (im Österricher Dilaekt…) Mir händ Träne glachet.

S’nächste Highlight isch de Uftritt vo de Arbetskollege vo mim Maa gsi. Sie händ en Miniplayback-Show mit em Heino, em Roberto Blanco ond de Diana gmacht. Uh, ich han nöm chönne, s’isch so luschtig gsii. Ond denn sind irgendwie alli Lüüt mit em Tanzfieber infiziert wurde. No bevor mir euse Hochziitstanz gmacht händ, sind d’Lüüt scho am Tanze gsii. Mir händ en super DJ gha, wo mega gueti Stimmig gmacht het ond drum hets überhaupt niemert gstört, dass ich min Eröffnigstanz mit mim Schwager tanzet han ond de offiziell Hochziitstanz erschot um Mitternacht cho isch.

S’isch für es en superschöne Tag gsii, ich bin de ganz Tag wie gschwebt (ich weiss jetzt, was de Usdruck of Wolke 7 schwebe heisst). Ich hoffe, ihr chönd all au so en wunderbare Tag erläbe, wie mir’s händ dörfe.

Alles Liebi
Souris

• Zitieren

ohhh sooo schön!!! han gad au chli mitgflennt

ich freu mich für eu 2, dass ihr so en schönä und wohl au perfektä tag ka hen! ich find das super, wenn dgäst söviel spieli machen und sich sö viel sachä ifallä lön. wow, echt super bricht

Lg und alles alles gueti eu 2



Sid am 13.02.2009 verhürotet und am 02.10.2010 isch üserä grossi tag

• Zitieren

nicht registriert

echt toll, souris! hört sich perfekt an und ich freu mich für dich ! alles gute

• Zitieren

Hallo Souris

Herzlichen Glückwunsch zu deiner Traum-Hochzeit.

Darf ich fragen ob ihr evt. eine Hochzeitshomepage habt und wie euer DJ geheissen hat und was für eine Stilrichtung er gespielt hat?

Liebs Griässli

Es grüsst der Hase


verliebt seit 14.07.99
verlobt seit 14.07.09

Zuletzt bearbeitet am 16.09.2009

• Zitieren

Hallo
Ich wünsche Euch alles Gute!
Dein Bericht tönt so, als wärs der schönste Tag im Leben gewesen!

• Zitieren