hoi emma, schön, das dir de bricht gfalle het.

mini trauzügin het mir als überraschig en bluemestruss mitbracht. ich denke, dä het si au nid vill vorher in uftrag gäh. es chunnt halt eifach druf a, was für vorstellige hesch, was für blueme d willsch (obs die müend bstelle) etc. aber wennd relativ offe bisch, chunnsch sicher öppis schöns über.

ich fröi mich scho, din bricht zu dinere zivilhochzit z läse (natürli nur wennd luscht hesch) und wünsch der en wunderschöne tag, wettertechnisch wie au im herze schön (und s zweite isch doch s wichtigst)!

• Zitieren

Danke viel mal liebi Drusilla, sehr gern wirdi am Fritig drüber brichte

• Zitieren

Liebi Drusilla, ich han din Itrag leider überseh, und jetz freuts mi umso meh dass am 23. Mai a mich denkt hesch, herzliche Dank, jöö isch das lieb!

Drüber brichtet hani au nie he? Ganz schlimm... hani verschwitzt, aber natürli weissi no haargenau wie euse Tag abgloffe isch :)

Tatsächlich isch s Wetter nöd mal sooo schlimm gsi, im Gegeteil hani gmüetlich und ohni Schirm zum Coiffeur chöne und mir hend sogar no Glück gah bim fötele, s Wetter het ghebet bis mär zum Standesamt gloffe sind, punkt 17h hets afange regne ihihi aber denn sind mir ja scho drin gsi und nach de Trauuig simmer halt alli wie de Blitz is Auto grennt, d Föteli hemmer ja scho gmacht gah :)

Also, de Reihe nah... mir sind beidi sehr früeh aber überglücklich ufgstande adem Dunnschtigmorge, mir sind eifach guet druf gsi, hend d Wohnig dekoriert und s Nötige für de Apéro vorbereitet, uf di 11h bini zum Coiffeur (sie het mir ä wunderschöni Frisur anezauberet) und ohni dassmärs gmerkt hend isch halt doch scho bald 15.30h worde und mir hend eus agleit und gegesiitig bestuunt (min Maa gseht halt scho Hammer us, vorallem im Azug ) ihihi mir hend abgmacht dass eusi TZ zu eus heichömet und zum Glück isch mini TZ so fründlich gsi und isch mir ufem Weg zu eus de Bluemestruss go hole, wär nämli nüm selber dezuecho. Dihei hemmer agstosse und ufem Sitzplatz no schöni Föteli gschosse (mit Sunne) und gscherzt und glacht und irgendwie bini gar nöd nervös gsi, pünktlich hemmer eus denn uf de Weg zum Standesamt gmacht wo scho mini Eltere uf eus gwartet hend, langsam sind denn alli cho und mir sind gmeinsam in Ratsaal ufegloffe, eifach ä wunderschöns Gebäude! Ganz chribelig simmer anegsässe und d Standesbeamtin het ä ganz en emotionali Trauuig ghalte, s het witzigi Abschnitt gah und wo sie plötzli gseit het "so, jetz chömemer zum Teil wo alli druf wartet.." het mis Herz afange poche, han min Schatz agluegt und han d Träne nöd chöne hebe, mir hend s JA-Wort ganz schüüch usebracht, hend d Ring tuschet und eus küsst und umarmt, s isch würkli en unvergessliche Moment gsi...

Voller Freud und no ganz grüehrt hemmer d Gratulatione entgegegno und hend no Familie- und Gruppeföteli idem schöne Saal gmacht. Sind denn langsam use und denn hets gregnet und wie! Mir sind under euse roti Schirm (wo übrigens perfekt zu mim rote Kleid passt het) und zum Auto grennt. Bi eus dihei hets denn en super feine Apéro geh, s het sooo viel z'Esse gah, Musik und gueti Stimmig, s isch sehr ungezwunge und eifach gsi, aber für eus perfekt, genau so wie mir's eus vorgstellt gah hend. De Plan wär eigentli gsi dass mär aschlüssend mit eusne 4 TZ wäret go esse, aber mir sind so volle gsi dass mär denn z'6ste en Dessert im Mövenpick sind go esse. Öpe um Mitternacht simmer wieder dihei gsi und sind überglücklich is Bett gfalle... gschlafe hemmer aber no lang nonig, will mär nüm hend chöne ufhöre schwätze, mir sind de ganzi Tag nomal duregange, hend drüber glacht und eus gfreut dases so glunge isch.. ach isch das schön gsi! So... zwar mit grosse Verspötig, aber en usfüehrliche Bricht vo eusere Ziviltrauuig

• Zitieren

@Emma: Danke villmal für de Bricht! Han gmerkt, han dir gar nie zrugg gschribe gha, sorry! Gläse hanen also

@Canoa: Nei, mach mer nid Angst!! Muen no so vill mache, han no kei Blueme und kei Turte!!

• Zitieren

Hallo Joanna, willkomme im Club!

Schön gitts soviel Parallelbrütli, ich freu mi scho so sehr und es gaht ja gar nüm lang (mir sind sitem Mai 2012 verlobt und han denn grad mite Vorbereitige gstartet, bin also au froh wenn endli de Tag chunt)

Mir hend zum Glück di grosse Pöste au scho abghöcklet und sind jetzt mit bastle beschäftigt :)

• Zitieren

Jetzt fangt denn scho glii die Ziit a, womer täglich ufd Wetterprognose lueged, ich uf jede Fall

@Emma: Was baschtlisch denn? Ich verziere grad Gläser für mini Candy Bar

@Joanna: Es gaht no so mit nervös si. Bis jetzt hani einfach kei Zit dezue gha. Aber ich han drü Täg vorem Hochziit frei, ich nime a, mit so vill freier Zit wirdi denn extrem nervös Ich wünsch der en ganz en kuhle Polterobig! Mine het d Trauzügin echli versaut, es sind nid emal d Helfti vode Lüt cho, will sis so churzfrischtig organisiert het und zwei sind denn no chrank gsi (da chan si natürli nüt defür), so das mer schlussendli nur z Vierte gsi sind Naja, mer chan nid alles ha.

• Zitieren