So mini Liebe

Euse grossi Tag isch mitlerwiile scho meh wiene Wuche her. Mir hend eusi Minimoons sehr gnosse und jetzt wett ich eu doch au vo eusem schönste Tag im Läbe brichte

Am Sa., 13.07.13 sind mi Maa und ich am 7 ufgstande u hend nochli zäme zmörgelet. Am halbi 8 sind denn au scho eusi TZ und TM cho eus abhole. Am 8 sind mini Schwöstere und ich bim Make-up und Coiffeur gsi und aschlüssend denn d Blüemli gah hole. Au min GG het sind Coiffeurtermin gha und isch mit sine zwei Manne de zum TZ hei sich gah alegge und no gah game

Nachem Blüemli hole, sind au mini Schwöstere und ich zu mir hei, wo scho d Fotografin uf eus gwartet het und eus bim alegge und paratmache gfötelet het. Scho dete wo ich mini Schwöstere und mich s erste mal mit allem Drum und Dra gseh han, hanis fast nid chöne glaube, das ich höt wirde hütate

D Fotografin het sich denn 15min vor eus uf de Weg zude Fotolocation gmacht, wo min GG und sin TZ scho gwartet het. 15min später bin ich denn mit minere Schwöster au cho. Min GG isch scho am Rhyufer mitem Rugge zu mir dreiht gstande und het gwartet.. Gott hend mini Chnüü plötzlich afe zittere und ich bin richtig nervös worde.. Zwei Meter vor ihm, het er sich denn umdreiht.. Es isch es abartigs Gfühl gsi und ich ha am ganze Körper afe zittere und mir sind beidi ziemlich baff vonenand gsi (ich ha mim GG immer gseit, ich hig es gälbs Abigchleid, han aber natürlich es richtigs wiises Bruutchleid gha)

Nachdem mir die Idrück schomol hend lah sacke, hemmer denn zwei Stunde föteli gmacht. Richtig schön am Rhyufer, im Naturschützgebiet und uf lahmglete Gleis. Es isch mega heiss gsi und ich bin richtig gspannt, wenn denn d Föteli chömed...

Am 13.00 Uhr het uf es denn en Rolls Royce Phantom gwartet (es Gschänkli vo eusne TZ und TM). Es mega Auto

D Fotografin und eusi TZ hend sich denn scho ufdem weg zum Standesamt gmacht und min GG und ich sind 45min mit dem Auto gah ume fahre, dass mir nochli Ziit z zweite chönd verbringe.

Churz vor de zweine sind denn au mir im Schloss Böttstein acho. Mir sind beidi soo nervös gsi. Womer usgstiege sind, hend eusi TZ und min Papi scho dusse uf eus gwartet. All hend Träne ide Auge ha, es isch so toll gsi

Min GG isch denn mit de TZ inegloffe und ich ha no 2min mit mim Papi dusse gwartet. Wo denn euses Lied cho isch (Soundtreck vo Shrek) simmer los gloffe. All Lüst sind gstande und min GG det vore het sini Träne eifach nüm chöne zrugghalte und het so müesse brüele, es isch soo schön gsi. Min Papi het mir denn en Kuss geh und mich mim GG übergeh

D Trauig isch nume öpe 30min gange, aber sie isch so toll gsi. D Standesbeamtin het so tolli Gedich vortreit und wie mir zäme cho sind und was mir eus für d Zuekunft wünschet. Wo denn s JaWort cho isch, han au ich mich nüm so under Kontrolle gha und mir hend zäme chli brüelet und glachet mitenand Bim Ringtusch hend mini Händ so zitteret, dassine fast nid anebracht han

Wo sie eus denn zu Maa und Frau erklärt het, hend all Applaudiert und es isch vom Robin Thicke Blurred Lines cho. Mir sind denn zerscht use und det isch de ganz UHC vom GG mit de Stöck und Confettikanone spalier gstande. Mir hend denn zwei Stunde im Schlossgarte gaperölet mit allne bi dem traumhafte Wätter.

Am halbi5 simmer denn mit emene hupende Convoi zude Abiglocation gfahre. Es isch soo toll gsi, hinder eim öpe 20 Autos wo dure ghupet hend

Dete acho hets nomal en riise Apero geh mit allem wome sich wünscht inkl. Raclette. Es isch mega fein gsi. Scho bim Apero hend mir denn es Spieli müesse mache, wo min GG is Goal het müsse hocke und öpe 8 Gäst hend uf ihn gschosse. Wenns kes Goal het geh, han ich e Frag müsse beantworte und wenn di au richtig isch gsi, hend mir en Guetschii becho, womer vo eine vo eusne Gäst hend chöne ilöse (z.B. en Sunntigsuflug, es zNacht, etc.). Wenn er ihn ineglah het, isch die Rundi ume gsi. Eine het er drii glah und ei Frag hani nid chöne beantworte.. Während em Apero hend mir bi de Gäst no gfötelet, mega cool ufem Spielplatz mit de Schauklene und so

Nacher simmer in Saal, wo mir en Tag vorher deckt hend gha, er het so schön usgseh (sorry das Eigeloob, aber es isch würkli mega gsi ).

Det hemmer dennn wider es paar Spieli müesse mache und mir hend no e Fotishow becho. Die isch so lustig gsi. Min GG und ich sind zäme cho, womer 15 und 19 sind gsi. Die Fotis sind natürlich mega witzig gsi, so vom Afang vo eusere Beziehig und so

Denn hets sehr lecker ässe geh, mir hend es Grillbuffet mit Herdöpfel und verschiedene Salat gha. Es het öpe 15 verschiedeni Fleisch geh und es isch eifach nume lecker gsii... Mmmmhhh...

Nach dem leckere zNacht simmer de no use, wos scho dunkel isch gsi. Es het alles Luftballön mit LEDs dinne gha und jede Gast het sonen farbige Lüchtstab ide Hand gha. Das isch super gsi, de hemmer nomal eso zwei Föteli gmacht und hend denn dusse no s Überistimmigsspiel gmacht.

• Zitieren

Wow Sterndli, das tönt mega schööön! Nomou härzlichi Gratulation! und merci för dä bricht!

• Zitieren

Liebs Sterndi
Wow, din Bricht isch sooo herzig und schön.. Ha mi di grad so vorgstellt.. freu mi uf Föteli. Und dass din Maa denn bi dr Trauuig het miesse tränli verdrucke...
Ig glaub dir, dass dir en super Dag gha heit, ha au a di denkt....

• Zitieren

Hallo zäme

Danke für eui Glückwünsch!
Mir hend d Föteli übercho, ha zwei im Facebook und wenn mir denn all mal so richtig dureglueget hend, chumi sicher am Wucheend dezue, welli inezstelle

Wünsche eu es guets Tägli.

Grüessli

• Zitieren