| Anmeldung zum Apéro? |
|
|
1 2 3
|
madmadi  am 19.02.2008
Anmeldung zum Apéro?
Hallo Brütlis und Brütigämmer (falls sich mol wieder eine do häre verirrt  )
Mer fiele grad no ade letschte Fiinheite vom Text vo öisere Iladig ume bevor mer de grossi Druckuftrag starte und stecke irgendwie mit folgender Frog fest:
Isch es doof, au d Apérogäst z bitte, Bescheid z gä, ob sie chöne cho? Mer händ ane Formulierig dänkt à la: "Wenn der öis Bscheid gänd, öb ehr chöned debi si, erliechtered ehr öis d Planig."
Deför spricht (be ca. 100 Apérogäscht), dass mer denn ungefähr weiss, öb mer eher för 150 (inkl. gladeni Gäscht) oder eher för 120 Lüt muess bstelle, was be ca. Fr. 20.-- pro Person total en Differänz vo Fr. 600.-- usmacht. Mer wänd ned Rappespalte ond mer fröie öis, wenn alli 150 Lüt dete send, aber wenn denn vel ned chöme, esch doch ou schad, wemmer scho zahlt het ond d Läbesmittel müend wäggschmisse wärde.
Degäge spricht, dass das ned üblech esch ond schinbar no nie öpper uf d Idee cho esch, dass es guet wär - es git also secher Grönd, ned alli um en Amäldig z bitte. Mini Schwöschter meint, wenn mer zum Hochzit iglade sig, denn göi mer grundsätzlech und wenn's ned tät passe, wörd mer ou Bscheid gä. Das heisst, mer sölle mol met allne rächne ond denn eifach die abzieh, wo scho gli säge, es göine ned. Lüchtet mer scho ou no i.
Het sech öpper ähnlechi Gedanke gmacht? Wie lösed ehr das?
Grüessli
madmadi
Ich hürote mi Schatz ganz genau 10 Johr nach öisem erschte Koss, am 8. August 2008!
|
|
|
bettina  am 20.02.2008
Re: Anmeldung zum Apéro?
Hallo Madmadi
Also mir hend üs au scho die gadanke gmacht ... au wenn mir eigentlich viel zfrüeh dra sind sind diiladige scho gschtaltet ... werded aber nonig verschickt 
Mir werdet bi dä bankettgescht und bi dä apero gescht um ameldig bitte. eso dass sie sich müend amelde ... isch schüscht eifacht schwer die richtig azahl apero häppchen zha! mer wend ja nöd dass eusi gescht müend hungere 
ich denke nöd dass es "frech" isch das eso zmache ... mir hend denn au uf eusere hochziitswebpage (www.wirheiraten.ch/bettinamarcel) innegschribe "apero nur mit anmeldung".
isch sicher am eifachste für üch und en chline ufwand fürd gest.
grüässli
bettina
Hochzeit am 20. Juni 09
|
nordliecht am 20.02.2008
Re: Anmeldung zum Apéro?
ich bin grad letschti am ne hochzeyt gsi, wo mer sich het fir de apero amäldä miässä. ok, sie hend ai in etwas 600 gladni gäscht gä, und nu eppä 300 aperogäst 
aber grundsätzlich, wieso nid en amäldig? mier werdid keini mache. mier rächnit die traditionelli aperoberächnig (ca. 75% vo de verschicknigä iiladigä = anzahl aperogäst). derzue werdid mier sicher gnueg berächnä. mier persenlich mechits nid, will mier nid mechtid, dass sertigi wo vergässä hend sich aazmäldä, denn nid truiit z'cho. gherä nämlich ai zu denä 
en guätä tagesstart & griässli
nordliecht
miär freyid eys uif de 6. septämber 2008 :-)
|
madmadi am 20.02.2008
Re: Anmeldung zum Apéro?
Genau das hämmer öis jetzt ebe ou öberleit - dass denn velecht, die, wo nid dra dänkt hend, sich azmälde, ned troue cho...
Ha's nachdäm ich do mi Itrag gmacht han no met mim zuekönftige Exfrönd agluegt ond är het denn ou gmeint, mer chönnted's ou wäglo. Mis Schwöschterli het no gseit, wemmer zum Hochzit iglade sig, göi mer grundsätzlich und wenn's ned passi, dänki si, wörde sech en Teil Lüt scho mälde, damit mer en ungefähri Azahl het. Ou es Argumänt.
Rächnet mer nor met 75%? Hmmm... findi sauwenig...
Grüessli
madmadi
Ich hürote mi Schatz ganz genau 10 Johr nach öisem erschte Koss, am 8. August 2008!
|
madmadi am 20.02.2008
Re: Anmeldung zum Apéro?
Wie viel choschtet be öich de Apéro pro Person ungefähr?
Grüessli
madmadi
Ich hürote mi Schatz ganz genau 10 Johr nach öisem erschte Koss, am 8. August 2008!
|
smil09 am 20.02.2008
Re: Anmeldung zum Apéro?
Mier sind jetzt grad fertig worde mit üsne Iladige. Mier verlanged au vo dä Apero Gäscht ä Ameldig. Mier händ eifach bi allne än Ameldetalon dezue tue und gschriebe "An- oder Abmeldung mit beiligendem Talon". Uf äm Talon stoht dänn, dass me sich selbstverständlich au per Mail oder telefonisch cha amelde. Bi dä gladne Gäscht verlanged mer vo allne ä Antwort. I dänk bi dä Apero Gäscht simmer dänn nöd ganz so "streng". Wänn jetzt mol öpper dä Talon nöd ischickt gömmer dänn nöd grad go stürmä und mer tuänd dänn sicher no chli ufrundä, dass äs au nöd öppis für diä het wo sich nöd agmeldet händ. Aber grundsätzlich findis wichtig, dass mer ungefähr weiss mit wievil Lüt dass me mues rechnä. Di ganz Hochzit choschtäd jo gnueg. Do wött me nöd no unnötig Geld usgeh. Und hungerä sötted's jo uf dä andere Site au nöd muäse.
|
nordliecht am 20.02.2008
Re: Anmeldung zum Apéro?
ich muess hit abig numal nachefrage, eb 75% stimmt. ich has irgendwie nu so im chopf. chan aber ai sey, das das en "gschäftsformel" isch. meyn zuekinftig het nu sehr viel gschäftspartner-bzw. bekannti uif de chärtliliste, welli sälbstverständlich ai an apero iiglade wärdet. aber sertig chemit natirlich viel eher nid als gueti bekannti.
cha diers bis morä sägä
ähm was isch en zuekinftigä exfrind ??? coole uisdruck 
miär freyid eys uif de 6. septämber 2008 :-)
|
madmadi am 20.02.2008
Re: Anmeldung zum Apéro?
he jo, zuekönftig esch er jo nömme mi frönd, sondern mi ehemaa, ergo zuekönftige ex-frönd 
smil09, meinsch ned, dass denn die, wo vergässe händ, de talon izschicke, nömme trouid cho, wie nordliecht das gschrebe het? vor däm hani ebe chli angscht... mer wette jo möglechscht alli debi ha. uf di ander site esch es natürli ebe zum plane super, wenn'd weisch, wie veu lüt as chöme.
nordliecht, stimmt, chonnt natürli drufab, wie sech d gäschtelischte zämesetzt... ich rächne scho demet, dass relativ en höche ateil vo de igladne wird cho.
hmmmmm, und was zahled ehr denn so für de apéro?
Grüessli
madmadi
Ich hürote mi Schatz ganz genau 10 Johr nach öisem erschte Koss, am 8. August 2008!
|
|
Mara nicht registriert am 20.02.2008
Re: Anmeldung zum Apéro?
Phu, also eg stoh vor genau em gliche Rätsel. Vorallem chönnntis be üs si, dass mega vöu lüt chömmet wo nid spezivisch iiglade wäred. D Trauuig isch drum i mim Dorf wo eg ufgwachse be und de weiss eg ächt nid wär aus chönnti as Apéro cho (Ehemaligi Schuelkollege, Bekannti usem Dorf, Vereine ect.)
Eg ha ächt kei blasse. Vom Budget pro person hani sicherheitshalber mau 30.-Sfr. grächnet, isch das vöu oder wenig???? Be chli ratlos was s Apéro agoht
Tamara & Simeon ~01.06.07~09.08.08~
|
bettina am 20.02.2008
Re: Anmeldung zum Apéro?
aso mir rechnet öppe 25.- franke pro person wo an apero chunt. mit getränk natürlich ...
han mal gläse dass es en guete schnitt isch ... aber mit 30.- isch sicher uf dä sichere siite ...
chunt ja au immer druff ah was mer genau organisiert a getränk und ässe
grüässli a alli andere brüt
bettina
Hochzeit am 20. Juni 09
|
|
|
1 2 3
|
Anmelden
