I ha grad mit üsere Organistin telefoniert und jetzt bini ziemlich frustriert…Sie hät üs scho Afang Johr gseit, dass sie än Sohn hät wo Saxophon spielt und dass dä eventuell chönnt mit irä spiele. Mier sind sofort begeisteret gsi und händ ghofft, dass das klappt. Hüt hemmer jetzt erfahre, dass es ebe nöd klapped. Also spielt nur d’Organistin ällei.
Eigentlich hät sie mier bis Mitte April ä Antwort versproche ka. Wil i nüt me ghört ka ha, hani vor zwei Wuche mol aglüte und erä au üsi Liederwünsch duregeh. Bi „The Rose“ hät sie dänn scho s’erscht mol nöd gwüsst vo wa dass i red. Si hät dänn gmeint sie tüeg alles mit äm Sohn bespreche und dänn mached sie üs as paar Vorschläg. Wil mier aber äs paar Lieder händ wo üs wichtig sind hani dänn entschiede alle mol ufzschriebe und irä än Brief z’schriebe. Anschienend isch sie i dä Ferie gsi und hät sich drum ersch jetzt gmolde (die letscht Wuche wär sie aber no dähei gsi und het sich au mol chöne mälde). Sie isch mit üsne Vorschläg gröschteteils nöd so iverstande und hät Vorschläg brocht wie „ganz in Weiss“ oder än Händel. Mier wönd aber “The Rose”, “Imagine” und “Power of Love”. Das isch eifach nöd ganz s’glich. Wenigschten hät sie nöd „Memory“ oder „Reality“ vorgschlage. Da würd scho eher passe…
Uf jede Fall bini zum Teil mol uf ünsä Lieder bestande aber mer müend irä jetzt teilwis d’Note organisiere. Jetzt weissi nöd wa mer sölled mache. Sie isch jo scho nett am Telefon und sie isch halt au gratis aber i bi erschtens nöd glücklich, dass es nur Orgelmusik wird si und zweitens findi si goht chli zwenig uf üsi Wünsch i. Mier hüroted am 24. Mai! Sölled mer no churzfristig versueche öpper andersch z’organisiere??? Dä wird sicher schwierig und würd halt au nomol äs paar hundert Fränkli choschtä. Anderersits treit halt d’Musig scho viel zu dä Stimmig i dä Chile bi.

• Zitieren

Hoi Smile
I dänke die Organischtä chönd halt nume d Chilelieder spiele und sind nid so flexibel. Guet, dänke isch warschindli au nid grad eifach anderi Lieder zspiele wänn sie kei Note hät.

Wänn ich eui wär würd ich nu wäg öpert anderschtem Luege. Evt. öpert Jungs vo de Musigschuel oder e Musiglehrerin. I de hütige Ziit tuet mer ja i de Schuel all die Lieder lerne und evt. gits do öpert wo du/ihr würdet känne.
Frög doch döt mal ah.

Es muen ja nid immer öpert sie wo mega tür isch.
Mängmol isch wäniger meh...


Hoffe, ich ha dir chli chöne hälfe.
Viel Glück bim suechä.

Suse

I bi sit em 1. Septämber 2007 verhürotät...

• Zitieren

nicht registriert

Hallo Smile,

da isch würkli doof und für mich nöt würkli nahvollziehbar. Eusi Organistin wird jetzt bis uf eis Lied alli vo eus gwünschte Lieder spiele und drzue hät si no e Sängerin organisiert wo sie drbi teilwies tuet begleite. Um d Note hät sie sich au selber bemüeht, obwohl sie nöt alli gha hät und hät eus somit nöt drmit belastet. Weiss ja nöt ob's eifach da drah liet, will mir eusere Organistin au öbis müehnd zahle.

I wür eifach mol no luege, ob d'ihr vielleicht no öber anderscht gfindet wo nid nume Zyt hät, sondern au bereit isch so kurzfristig ispringe. Wünsche eu uf jede Fall viel Glück.

Liebs Grüessli
passiondream

• Zitieren

Vile Dank für Eui Tipps. Mis Mami kennt no ä Organistin. Die macht mer sehr än guete Idruck. Sie isch zwor selber scho bsetzt aber si hät üs äs paar Adresse geh vo Kolleginne wo mer chönted afroge. Jetzt isch äs aber so, dass mer "üsi" Organistin (wo eigentlich i dä Ferie isch) vor äs paar Tag äs Mail gschriebe hät sie heg Note bsorgt. Obwohl mer immer no nöd 100% überzügt sind, dass si die richtig isch chömmer irä jetzt fascht nüme absäge. Immerhin hät sie sich jetzt drum kümmeret und hät isch offenbar entschiede die Lieder z'spiele. I hoff nu, dass sie sie dänn au guet spielt! I ha sie jetzt mol gfröget öb sie nöd glich no öpper kennt wo chönnt mit irä Saxophon spiele. S'wär halt ideal wänn die scho zämä gschpielt hetted. Natürlich hani no kei Antwort, aber sobald sie vo dä Ferie zrugg isch lüt i dänn a zum ä chli Druck mache... I dä Zwüschezit verzelled mer scho mol chli ume, dass mer uf dä Suechi nach ämene Saxophonist sind i dä Hoffnig äs chön üs öpper wieterhelfe.
I hoff, es klappet jetzt. Falls es no irgendwelche Problem sött geh bini froh, dass i wenigschtens äs paar Adresse vo Organschte ha wo mer notfalls no chönnted afroge.

• Zitieren