| Wann habt Ihr eure Hochzeit bekannt gegeben? |
|
|
1 2
|
Simonetta  am 19.02.2007
Wann habt Ihr eure Hochzeit bekannt gegeben?
Hoi zäme, bi vor einigi Täg ganz früsch uf die Site glandet und find sie würki genial.
Min Fründ und ich händ au vor zhürote (vorussichtlich im 2008).
Wie lang händer gwartet bis ehr das bekannt gä händ?
Wie händ euchi Eltere druf reagiert?
Wie lang vorher sett me mite Vorbereitige afange?
Grüessli
Simonetta
|
|
|
Andromeda am 19.02.2007
Re: Wann habt Ihr eure Hochzeit bekannt gegeben?
Hoi du!
also mir wend am silvester das jahr hürate (sind im moment na am abkläre, öbs mit de chile klapped). sobalds datum klar isch, wird ich dene lüt, won ich würkli däbi ha will bscheid gä. de einte kollege hani scho mal gseit sie sölled sich silvester eifach frei bhalte - aber noni wieso. die offizielle iiladige werded mir dänk denn so es halbs jahr vorher verschicke.
mitem vorbereite chunts glaub chli druf a, was du füres datum häsch, resp. öb du eis bestimmts datum wetsch. silvester isch jetzt halt z.b. es rechts speziells datum und drum sind mir au jetzt scho am luege weg fotograf, musig, etc. aber wenn es "normals" datum häsch, chönt me vermuetli au no es paar mönet warte.
liebs grüessli
|
Simonetta am 19.02.2007
Re: Wann habt Ihr eure Hochzeit bekannt gegeben?
Wow das esch ja würki rächt speziell! De fiiret der d'Hochziit und zusätzlich s'Neue Jahr als früsches Brutpäärli. =)
Mer händ vor im Juli oder September 2008 z'hürote (falls alles so klappet wies mer vorgseh händ). Eusi Familie esch au rächt gross meh oder weniger. A dem Tag wärde ungfähr 100-120 lüt debii si. Aber dänkes au so 1 Jahr vorher dass es afe emol de ängste Lüt metteilt werd.
I wünsche euch uf all Fäll alles Gueti
|
Andromeda am 19.02.2007
Re: Wann habt Ihr eure Hochzeit bekannt gegeben?
silvester isch ebe euse jahrestag! und irgendwie finde de gedanke u schön: neus jahr, neue läbensabschnitt...
ich würds am liebste jetzt scho allne säge :-)! aber zerst müemer mal luege, dases würkli klapped mit allem - en super schöne saal hättemer (ufem schloss liebegg) und mitem pfarrer chömer de termin morn hoffentli bestätige!
eusi familie isch (zum glück :-) nid so gross. am abig wärdeds im gsamte öpe 45 lüüt si.
wünsch dir au alles gueti!
|
sunshine am 20.02.2007
Re: Wann habt Ihr eure Hochzeit bekannt gegeben?
Guete morge zämme
Guete Morge Simonetta
Mir hüürote au im 2008, endi Juli/Afangs August...
Will ich en solitär bicho han zum Hürotsatrag heimers unserne Elterne eifach mitteilt, indem ich ihne dr Ring unter d'nase gribe han und sie hei alli gstuunt.
Mir wärde hoffentlich au um die 100 Persone sy, aber mir heis de lüt nonig mitteilt. Mir warte das d'Location und Chile definitiv reserviert sind und denne frogemer erscht unserne Trauzüge ob si drby sind. 
Und erscht denne wärdemers hoch offiziel allne ä mol mündlich mitteile (DATUM), dass sie au scho chöne vorplane und demnächst (afangs 2008) werd mir d'yladige verschigge...
Wo händ ihr den vor z'hürote?
|
klotenblau am 20.02.2007
Re: Wann habt Ihr eure Hochzeit bekannt gegeben?
Mir hürotend im mitte Juli das Johr. Mir händs üsna Eltere, Familie und Fründe a da Wiahnacht gseit, als speziells Wiahnachtsgschenk. As händ sich alli riisig gfreut. Überrascht sind's scho as bitz gsi, obwohl jo alli damit grächnet händ das mer bald hürotend. Mir sind jo immerhin scho 10 1/2 Johr zäma.
Ich wür aso säga ihr chönd guat no warte mit em Verkünde vo euem Hochziit. Gnüssed no a chli eues Gheimnis. Ich hans ganz scho gfunde s'Gheimnis no a chli für mich z'bhalte.
|
krindli am 20.02.2007
Re: Wann habt Ihr eure Hochzeit bekannt gegeben?
Hellou
Bi üs heis eigäntläch alli vom Tag a, wo ig dr Atrag ha übärcho, gwüsst.
So ganz offiziell heis mir de abär ersch gmacht, wo mir definitiv ds Datum vor Hochzyt hei gwüsst. Das isch öpä letscht Septämbär gsi, denn hei mir ou so richtig mit dr Planig agfangä. U sit mir d'Chärtli vor äs paar Wuchä verschickt hei, wüssäs definitiv alli!
Wedding: 23.06.07
www.karinundstefan.ch
|
Simonetta am 20.02.2007
Re: Wann habt Ihr eure Hochzeit bekannt gegeben?
es tönt alles würki sehr schön, vorallem gfallt mer die asicht vom gheimnis (kloteblau). das stimmt, bi mer weisses afe mal mini schwöster dasses evtl. nöchst johr werd stattfinde, i has öpperem müesse verzelle
sunshine bi eus stönd 2 date zur uswahl: entweder de 26.7.08 oder de 20.9.08. mini angst esch eifach im september, well me ja nie weiss wies wetter werd. obwohl...eigentli chamer ned emol drufgoh dasses im juli schön esch, i bi im hochsommer gebore und es het donneret und grägnet wie amene trurige herbsttag.
grüessli
|
cheesy  am 21.02.2007
Re: Wann habt Ihr eure Hochzeit bekannt gegeben?
@simonetta
I dä letschte paar Jahr si dr juli u dr Septämber geng u schön Wätter gsi. Im Juli geng chli heiss.
Zivil 23.4.07/ Chirchlich 19.5.07
|
Mutti am 02.03.2007
Re: Wann habt Ihr eure Hochzeit bekannt gegeben?
Hallo Simonetta
Ich finde dies mit dem Geheimnis auch sehr verlockend, möchte Dir aber aus meiner bald 26-jährigen Erfahrung als Tafelmajor nur folgendes auf den Weg geben. Sollte das Hochzeitsfest Ende Juli 08 stattfinden, dann behalte gegenüber denjenigen Personen, welche Ihr unbedingt dabei haben möchtet, das Geheimnis nicht allzulange, da teilweise die Sommerferien schon im Dezember des Vorjahres gebucht werden und dann wird es für diejenigen schwierig wieder alles rückgängig zu machen.
Betreffend Wetter könnt Ihr nie zum Voraus wissen, was besser ist. Ich hatte schon eine Hochzeitsgesellschaft im August und es hat auf der Rigi geschneit und dafür im April Wetter, dass man am liebsten in einer Badi das Fest abgehalten hätte!
Gruss Mutti
|
|
|
1 2
|
Anmelden
