nicht registriert

Hallo Zämme

Mir machet de Apero grad nach de kirche und darum kein Apero meh am Abig, da mir findet es wir suscht zviel.

Drum nimts mich wunder was ihr alles für Getränk und Spirituosen ah euem Hochzitsfest am Abig hend und was für eh mengi?

Mir hend bis jetzt:

90 Fl Mineralwasser
15 Fl Softgetränk
15 Fl Bier ( da bi eus sehr wenig Bier Trinket )
35x kaffe oder Espresso
10 Liter Früchtebowle
15Fl Rotwii

Doch mir sind eus da nöd ganz sicher ob das langet und ob mir no eh Spirituose neh sölled?
Drum bini jetzt mal gspannt was ihr so nehmed und was ihr vo eusere Getränke lieste denket?

Mir sind übrigens 35 Persone ah eusere Hochziit.
Freu mich uf eui Antworte



Grüessli Saraa

• Zitieren

Hoi Saraa

Wie vill Ziit rächnet ihr denn für de Apéro? Ond nämet ihr alles sälber mit oder lönd ihr en Teil liefere (evtl. mit Möglichkeit, dass ihr ned agfangni Fläsche weder chön zrugg geh)?

Mir händ tendenziell öberall ehner chli z'vill z'trinke igrächnet gha. Aber das chan au da dra ligge, dass mir ned en grad en heisse Tag gha händ. Ond a eusem Apéro hets nur wenig Salizigs geh, eher Fruchtspiessli, Tomate-Mozarella-Sticks ond so.

Liebe Gruess
souris

• Zitieren

Mir händ für de Apéro CHF 30.-- pro Person grächnet gha inkl. Getränk ond sind au öppe det usecho. Bi eus het aber s'Restaurant alles mitgnoh gha. Woher nämed ihr euches Getränk? Bi eus i de Nöchi gits en Getränkehändler, de würd ebe die ned g'öffnete Fläsche weder zrugg neh. Mir händ Wisswy (grächnet 1/3 Fläsche pro Erwachsni, alkoholtrinkendi Person) & Bier als alkoholischi Getränk ond Mineral ond O'Saft ond glaubs no Cola für d'Chind gha. Bi eus isch vor allem s'Bier guet gloffe, aber das händ mir scho im Vorus gwüsst gha...

Am Abig händ mir euse Wy (Rotwy) sälber mitgnoh ond denn eifach Zapfegäld zahlt. Mir händ für s'Getränk mit de gliiche chöste wie für s'Esse grächnet ond es het relativ guet passt. Insgesamt händ mir 45 Fläsche Rotwy kauft, aber nor 30 brucht (bi insgesamt 50 Persone am Abig). Beträffend Spirituose händ mir's so gmacht, dass s'Personal bim Kafi einisch mit em Schnappswägeli omegfahre isch ond wenn öpper no eine hetti welle, hettets mit eus abgsproche, ob das no offeriert isch oder ned. S'het aber fascht niemert meh öppis gno.

Hoffe es hilft dir chli.

• Zitieren

Uh ja, am Abig isch rächt vill Bier konsumiert worde. Vor allem nach em Ässe. Mir händ bis am 4i am morge gfästet ond nach em Dessert sind vill of Bier omgstiege. Bi eus hets übrigens am halbi 2 no en Chäsplatte geh. Das isch super acho, will vill Lüt denn vom Tanze weder chli Platz gha händ zom öppis schnabuliere...

• Zitieren

Ihr müend eifach iberächne, öb euri Lüt wieder heim fahred nach em Fescht. Denn bruchts nämmlich au eher meh Wasser und Bier, als Wi. Mir sind zum Feschtässe im Restaurant wo d Cousine vo mim Liebschte füert. Ich vertrau ihre do voll, möcht aber sicher en Wisse und en Rote zu de Gäng ha. Und de Räscht söll si eifach usschänke, was d Gäscht wänd. Wenns z vil afönd Schnäpsle mues me si denn halt irgendwenn brämse, aber das glaub i nid.
Zum Apéro hoff ich, dass min Brueder es Fässli Ueli-Bier mitbringt. Mues em das glaub mol no säge. Ich mein, ich hürot en Zürcher, und ich ha eifach Heimweh nach richtigem Bier! Mit mim Bruderchen wott ich uf jede Fall astosse, und es finded sich sicher au no anderi wos z schätze wüssed. Aber nur es chlises Fässli zum Apéro. Bim Apéro sälber dänk ich aber, dass es sicher weniger Wii brucht, und Champagner will ich gar keine. Kaffi wirds bi üs au nid gä, das find ich z kompliziert für s Apéro.
Ach, die Sach mit däne Getränk häng vo so vilne Faktore ab, mir lueged eifach au sicher, dass mer si neume nämed wo mer die zuenige Fläsche chöned zrugg gäh.

• Zitieren

hey zeme

@saraa: hät sich dini rechnig aber nöd nur ufde apero bezoge, oder? sus schwimmet eu die lüt jo dävo vor luter ztrinke :-)

mer hend bim apero mit 45 fr. pro person grechnet, lit aber dra, will mer üs jetzt für de quellehof entschiede hend (döt obe häts eifach nix gschids und alles isch usbuecht. zudem wönd mer de apero nöd selber mache) und die hend eifach immensi prise. häppli, früchtespiess etc. dävo machet 25 fr us. mer werdet orangesaft usem tetrapack loh usschenke, mineral, früchtebowle, wisswii und evtl. no e grossi fläschä champus. de alkohol machet mer beschränkt, sodass es budget nöd überschritte wird. mer rechnet mit 70-80 lüt und 2h apero.

am obet hend mer mit mind. eim liter mineral, mind. me halbe liter wii (wird sicher meh bi rotwii und wisswii) und me kafi pro person grechnet.

bier wötti eigentlich kei, wills für mi nöd zum doch eher edle ghaltene fest passt.

da min vater aber dä wii übernimmt und brueflich mit wii handlet, mach mer do nöd so sorge drum und verloh mi mol uf ihn. mer bringet wohrsxhcinlich no es paar eigni grossfläschä (5 l) mit, das chunt amigs no chli günstiger, sofern me a ikaufsprise irgendwie herechunt.


erstes Date: vor dem Millenium, St. Gallen
Verlobung: 8. August 2009, Malibu Beach California
Zivile Hochzeit: 8. Juli 2010, Schloss Arbon
Kirchliche Hochzeit: 10. Juli 2010 in der Pfarrskirche Bad Ragaz, Apéro im Quellenhof Bad Ragaz, Festessen im Restaurant Heuwiese in Wartau

• Zitieren