guete morge zäme

ha dänkt, eg mues mi au wieder einisch mäude. be jetz scho lang nümme im forum gse.^

@sonne: endlich hesch dis album übercho! so schön, das freut mi für de.

@elea: ou nei, be dene temperature vorusse schaffe... brrrr!! was schaffsch denn du, weni darf froge?

eg ha ändlich s'fotialbum vo der hochzit fertig gmacht. eg has jetz bi smartphoto gstaltet und be bis jetz sehr zfriede. ha dört au grad das vom zivile und vo de flitterwuche gmacht. jetz machi no s'album für eusi eltere fertig. das wird de s'wiehnachtsgeschenkli. :-) und nachhär chani de alli album grad mitenand bstöue. immerhin gits uf die erschti bstöuig 30% rabatt. das macht de grad chli öppi us!

ah und hüt am morge beni bim frauenarzt gse. er findets vorbildlich dass eg scho ha afo folsüri neh. er het gmeint dass alles tip top usgseht und mini eierstöck scho wieder d'funktion ufgnoh hei. ha ha, das tönt so witzig! er heit gmeint, dass 50% vo de fraue innerhalb vomene halbe johr schwanger werde und 80% innerhalb vomene johr. das tönt doch scho mou positiv. und de het er no gmeint, dass er glaubt, dass eg scho bald wieder wirde verbi cho, vorusgsetzt, dass mi ma gueti spermie het. ha ha ha, dört hani aso au grad müesse lache. eg be froh dass das alles so guet tönt het. jetz warte mer mou ab.

so, jetz aber gnue vo mir postet. ;-)
wünsche euch aune e tolle tag.

• Zitieren

hallo dandi, schön vo der z läse! das tönt jo super bi der!!! de cha me euch jo nor düüme dröcke dass es glii klappt!
wie hed denn dine fa gseh dass dini eierstöck d funktion wieder ufgnoh hend? hed er en ultraschall gmacht? sorry, wott ned indiskret sii, es nimmt mi eifach wunder...
mir hend eus jo au gedanke gmacht wege chinder, und je konkreter me drüber noche dänkt umso grösser wird de wunsch würd am liebschte de au bald loslegge. jetzt hed aber mi arzt "gmerkt", dass mir ei impfig fählt, schiins müesst mer 2x gäge masere, rötle und mumps gimpft sii. denn darf mer allerdings 3 mönet ned schwanger wärde... ich frog mi jetzt, ob die impfig denn so wichtig isch...? wüssed ihr, wie oft ihr gäge rötle&co gimpft sind?

• Zitieren

hallo zeme

sonne, das fotibuech tönt rechtig super!!! verstohni dassd freud hesch!!!

danki, das tönt jo super vo dim fa! toll das alles so guet lauft.
bes gester au grad bi mim arzt gsi ond hane gfrogt obi öpis müesst beachte wegem asthma wenni wörd wele d pille absetzte. wörd si nemli gern absetze, eifach zom luege ob alles funktioniert. zobe hani met gg no bez öbers thema chinder gredet und naja... ergendwie hemmer do bez anderi vorstellig wenn mer wend loslegge. i hetti gern jez d pille abgsetzt und de so imene johr de avo lo druf acho. er gseht das bez anderst. er möcht dassi erst i 2johr d pille absetzte. i hanem de gseit, dass es locker es johr cha go, bes sech alles ipendlet het, und das es nomol locker es johr cha go bes es wörd ischloh. und i hanem au gseit dassi ned so lang möcht warte... er het denn eifach gseit, doch 2 johr wetter schono warte...
das het mi ergendwie so verschreckt und mer erst wörkli bewosst gmacht, dass i ned so lang wet warte. vorallem well mer au ned nor eis chend wend, wetti ned s erste met 33ha oder so... er het de gseit er muss sech mol bez gedanke dezue mache... i hoffe mer fende no ergendwie öpis wo för beidi stemmt. hanem ebe au gseit i wörd gern pille absetzte ond eifach anderst witer verhüete. ergendwie het em das au ned so pässlet. das het mi denn ergendwie es bezeli hässig gmacht, well schloss entli eschs min körper und do eschs eifach elei mini entscheidig ob ich die hormon no wet ne oder ne! wi gseit i wörd nie ufhöre verhüete ohni das met ehm abzspreche aber ebe wenni die pille nöm wet ne und en anderi möglichkeit wet fende denn erwarti ergendwie chli meh kompromessbereitschaft...
ke ahnig, velecht hani mi do au i dem moment em chopf echli i öpis ine gsteigeret. of all fell hets mol guet do dass do ufzschribe...
wönsch euch no en ganz e schöne obe zeme!

• Zitieren

merci för dini liebe wort
i ha halt ergendwie eifach demet grechnet dass er bez verstendniss deför zeigt dassi d pille nöm wet ne. i ghöre vo so velne dass es ehne besser goht ohni pille. ond i wet eifach ned erst d pille absetzte wenn de chenderwonsch sehr gross esch. denke ned dassi dene gross geduld het zom ewigs zwarte bes sech alles ipendlet het.
aber ebe i glaube för männer esch das generell bez schwerig noh zvollzieh wis esch met de pille ond all dem....

emma, so toll dass bi der alles so guet klappet het metem absetzte und s der spührbar besser goht!

• Zitieren

Hallo mitenand

Bin grad ächli am Ziitvertriebe und ha denkt meld mi mal wieder. Ich chume ja immer Mails über wenn ihr schriebet und wenni mal Wifihan tue ich die abläse u das isch den Mini Lektüre, danke ad Sonne und d'elea dass ihr so fliessig schriebet

Mir sind bereits in Neuseeland ahcho und mitem Camper unterwegs, macht Spaß. Jetzt hämer nur na 8 Täg und denn simer scho wieder die Heime,leider gönd Ferie eifach viiiiiiel z'schnell verbi.

sonne13:

---

jetzt hed aber mi arzt "gmerkt", dass mir ei impfig fählt, schiins müesst mer 2x gäge masere, rötle und mumps gimpft sii. denn darf mer allerdings 3 mönet ned schwanger wärde... ich frog mi jetzt, ob die impfig denn so wichtig isch...? wüssed ihr, wie oft ihr gäge rötle&co gimpft sind?

• Zitieren

hallo zäme

juhui, hüt esch scho fritig! eg be sooo froh. morn goni mitere kollegin uf stuttgart a wiehnachtsmäret bis am sunntig und am mäntig hani frei. juppi!

geschter hani endlich aui mini fotialbum bstellt. läck ben eg froh!

elea, e glaube, di ma meint das nid bös. männer mache sich haut eifach nid so vöu gedanke wie mir fraue und de säge si mängisch sache, wo eus verletze, obwohl si das gar nid so meine. eg findes eigentlich es guets zeiche wenn er seit, dass er mues drüber nochedänke. de macht er sich ömu gedanke über euchi zuekunft und das esch doch schön so. für männer eschs halt scho sehr eifach, wenn d'partnerin pille nimmt. de müesse si a nüt dänke und es esch alles paletti. e glaube, veli männer hei gar ke grossi ahnig wass es süsch no so für verhüetigsmethodene git. velich wott er sich jo mou schlau mache :-) und dass är gseit het dass er sich 2 johr als zitplan vorstellt, het glaubs au nid sooooooo vöu z'bedüte. velich möcht är im moment eifach no euchi partnerschaft gniesse als verhürotets paar und möcht noni grad sofort chind ha. be söttige ussage mues me bi männer mängisch chli vorsichtig si. das esch so mini erfahrig. das bedütet nid unbedingt, dass är sich do drüber scho gross gedanke gmacht het, sondern dass er im moment velich eifach no chli bedenkzit brucht. mir fraue mache eus jo immer scho mega lang im vorus gedanke und wenn mer de öppis säge, hets scho händ und füess. das esch bi männer nid unbedingt so.
e dänke do a die zit vo de hochzitsvorbereitige zrugg. eg ha mir ame scho stundelang der chopf drüber zerbroche wie öppis bestimmts söu usgseh und ha im internet scho gsurft wiene blödi. weni ihn de gfrogt ha wien er sich das vorstellt het er ame gseit: aha... bruchts das? über das hani no gar nie nochedänkt.
eg würd vorschloh dass chli zit losch lo verstriche und ihn de wieder mou druf asprichsch. bis de gsehts velich scho andersch us.

• Zitieren