Guete Morge Zäme

Ich hoffe dir sind alli fit ?

Hei Elea ha scho am Zyschtig welle froge, wie hesch eigentli s Yoga gfunde *wundernimm*?

Ich bi total fuul hüt aber sust gohts mir guet, ha gester no de Termin übercho für de Ultraschall und cha das i 2 Wuche go mache, do beni ächt froh. Sust stresst mi das Thema grad ned eso will ich dänke wenns Grund zur "Panik" gä hätt denn häti mich mini FA sicher direkt i Spital gsteckt aso gangi jetzt eifach devo us dass es öpis harmloses wird sii.

Wäge Chinderwunsch gohts grad au wieder besser, konzentriere mich uf anderi Sache damit d Gedanke ned nur no um das kreise .

Hei Himbi ich hoffe di Körper pendlet sich bald mol ii, das esch jo mega müehsam . Aber hei immerhin hesch jetzt mol ändlich Periode gha jetzt drück ich dir d Dume dass sich de Zyklus wieder normalisiert!

• Zitieren

guete morge zeme

snet, aso met "spntan" hani ned gmeint dass am morge vom Flogtag sellsch entscheide. eher, dass das jo auno zomene spötere zitpunkt chasch entscheide(2mt vor em flig). denke scho dass s Baby au es ticket oder so öpis brucht, aber choschtet dud das secher nüt wenns ofem schoos hesch...

eve, du besch de ufmerksam dass dra denkt hesch dassi am mentig yoga gha ha
aso muss sege i be weder begeisteret no fendis doof. i weiss halt nonid so obs miis deng esch. i due mi halt bez schwer met dene entspannigs üebige. i be sone zabbli und de chani ned eifach det he legge und d auge zue mache und mi enstapnne. i luege de wine Psycho em ruum ome was di aneder so mache d üebige ansech send guet gsi. me hets donkt es send vorallem üebige zom dehne wo ned so astrengend send. aber wenn si seit dass das guet före becke^bode esch de glaubi ehre das mol of all fell hani mega guet gschlofe nachetene :)
öbrigens schön dass di momentan besser füehlsch und alles bez lockerer chasch neh :) das freut mi mega för dech!!!

• Zitieren

Ui Snet di Chef het jo wohl en Egge ab, do wördi mi au loh chrankschriebe das chas jo ned sii!

Elea wägem Yoga, aso ich cha dir nur säge, d Würkig "entfalte" tuet das i de Regel wenn me's es zyytli gmacht het, i de erste 3-4 Yogastunde beni mir au komisch vorcho und ha ned rächt gwüsst öbs mir wörkli wohl esch oder ned. S esch halt au öpis wo me sust nie macht, wenn liehsch scho eifach emol ane und versuechsch ganz bewusst dich z entspanne? Me esch sich immer gwöhnt uf Zack z sii, drum find ich persönlich s Yoga ebe eso toll, eifach mol 1 Stund i e Wuche gohts ned um Leistig, me cha s Hirni abstelle und eifach mol sich sälber richtig gspüre und sich bewusst Zyyt nä für das. Ich mache eigentli au bi allem immer d Auge zue im Yoga, finde denn bringts mir viel meh und ich bi ganz bi mir.

Aber cha dir säge mir mache mängisch au Sache wo mi aschisse, z.B. so Atmigsüebige (do geht's mega viel verschiedeni Technike) esch ned so mis Ding das kackt mi immer ah hihi, aber sust findi eifach me dehnt ebe wieder mol de Rügge etc. richtig und macht Bewegige wo me im Alltag eher ned eso mache wörd. Aber hei schön dass'd wenigstens guet gschlofe hesch nachhär .

Plus chunt sicher no dezue dassd jo chli A.... tag gha hesch am Mentig und a so Täg esch für mich amigs s Yoga au ned glich wie wenn ich z friede anegange, aso loh di mol überrasche wie's no so wiiter goht .

• Zitieren

guete morge mitenand:

@snet: ja ich mache auch NFP. temperatur messen alleine scheint mir zu wenig aussagekräftig zu sein. deshalb traue ich eigentlich auch diesen zykluscompüterchen nicht über den weg, zumindest nicht, wenn sie zur verhütung verwendet werden, hihi

@yoga: oh da hani di au no welle fröge elea. ich ha mi jetz für en early bird workshop agmeldet, gang ab endi november bis vor wiehnachte jede mäntig morge am 7ni is yoga. ich bi ja voll nöd de früehufsteher, aber ich freu mi voll druf!

• Zitieren

Guete Morge Zäme

Elea ich mache Yoga jetzt sit chli meh als 5 Johr und ha nach es paar Mönet gmerkt dass ich afange mich verändere, aso dänke das brucht eifach es Zyytli bis es "achunt". S esch wörklich e Üebigssach dass me sich sälber cha entschleunige und bewusst entspanne, aber cha mir vorstelle dass genau so Sache ebe ächt hilfrich chöne sii bi de Geburt. Eifach sich sälber genau chöne wohrnä und au s teufe schnuufe i Buuch etc. sind alles z.B. Sache wo mir bis jetzt immer sehr gholfe händ wenns mir körperlich schlächt gange esch (z.B. Chrämpf etc.).

@Sonne: das glaubi dass d Zyyt bi dir no viel meh rennt, mit so zwöi chline Sünneli flüge d Täg nur so verbii gäll. Aber schön dass du's / dir's au so chöned gnüsse s goht so schnäll und sie sind plötzlich im Chindsgi .

@Himbi: so cool wägem Early Bird Workshop das fändi au no interessant, esch sicher e guete Start i Tag .

• Zitieren

@elea: haha also bisher hani mi ja nur agmeldet, ich ha no kei lektion gha so früeh am morge. ich weiss also nonig öbi würkli so diszipliniert bi :D aber ich freu mi sehr druf! wahrschinli machi glich näbedbii no es 10ner abo demit ich mitere kollegin no cha unter de wuche mal gah. wott aber zerst mal no d krankekasse fröge öb sie eventuell öppis dra zahled.
s erste woni glernt ha im yoga isch nöd nach links und rechts luege und mit dere strategie gahts eigentlich ziemlich guet :D

ich bi gester no bim neue FA gsi, de isch mer sehr sympathisch. er hät jetz gmeint, es cha halt sii das mer bis zumene jahr nach absetze unregelmässigi zykle hät und das mer mal eifach so sölled wiitermache so bis im januar/februar. und denn chäni mi ja mal melde demit mer gnaueri untersuechige cha mache. ich finds super, er isch sehr entspannt aber glich laht er eim nöd monatelang warte.

• Zitieren