Hey Dandi schön vo der zläse!

Jo be euch gohts jo scho rächt vorwärts metem Huus...wenn ca werds bezogsbereit si?

Mi Ma wet so 800m2 damet de Pool ou Platz hed
Lieber weniger förs Land zahle ond deför es schöns grosses Huus ha als es Tüürs Land ond es monzigs Hus droffe!

• Zitieren

800 m2 esch e tolli Grössi. Eusers Land esch 700 m2 und es esch tip top. Wenn mir aber no mou zrugg chönte, würde mer gärn no chli meh ha. Dur d'Hanglag hei mir rächt vöu Gfäll ufem Grundstück und dur das nid so vöu Raseflächi wo de würklech flach wird si. Aber egal, derfür wärde mer nid so vöu müesse der Rase mähie. Hi hi.

Wenn alles planmässig verlauft sötte mer chönne im Oktober/November zügle. Da mir aber bereits i der Planigsphase immer wieder Verzögerige gha hei, glaubi noni so würklech dra. Eg hoffe eifach, dass mer Wiehnachte chöi im neue Hus fiire. Das esch mis Ziel!

• Zitieren

765.- pro m2? wow dasch saftig!!! bi eus chaschs bouland au ned zahle, drom denke mer do erst gar ned dra

ou dandi, glaub Sache ussueche före inneusbou tönt mega cool! das wörd mer aso au gfalle :)
blibts emmerno debi dass si em märz wend avo met boue?

wenns land am Hang hesch, hesch zwar weniger flächi zom nötze aber deför hesch halt d ussecht und luegsch ned grad em nochber i garte! das fendi esch de fast nomeh wert :)

• Zitieren

ich bi scho recht happy das mer s land scho händ, das macht sehr viel us... ich weiss gar nöd gnau wie gross dasses isch, aber ich ha au so 700qm im chopf.

@dandi: ich ha sehr gern moderni hüser und ich hett eigentlich gern es flachdach, aber das isch nöd erlaubt i dere zone, soviel weissi scho mal. mir werded aber sicher so modern wie möglich baue und denn halt vorallem bim inneusbau druf achte. ich wott nöd allzu grossi zimmer, defür lieber e grossi wohnflächi, so wohne, esse, choche kombiniert, das findi super. schlussendlich verbringt mer ja eh nöd viel zit im zimmer selber. mir isch sicher d chuchi sehr wichtig und d bäder denn au.

mir baued ja es zweifamiliehus bzw. es huus mit iiliegerwohnig für mim maa sini eltere, da müend mer denn sicher scho gnau plane... ich finds ok im gliche huus z wohne, aber ich wott zb sicher zwei verschiedeni igäng, zwei sitzplätz etc. damit mer sich nöd immer so uf de pelle hockt. aber ich denk das isch scho machbar.

ufs iirichte und ussueche vo de plättli etc freu mi au scho! zum glück händ min maa und ich en ähnliche gschmack. mir hetted au gern eher dunkels parkett, das weissi au scho.

• Zitieren

ou es mehrgeneratione huus esch öpis ganz toll himbi! ebe, wi du seisch, so lang gwössi Sache trotzdem no trennt send wie de Sitzplatz und so fendi das mega! so chont me sech au ned i weg und stört sech ab de andere. so öpis wörd mer au gfalle. aber wi du seisch, das muess guet planet si dass es för bedi Partei stemmt!

dandi, du hesch mer jo beschrebe a welem hang dass euches huus wird si. i stelle mer d ussecht ufd Stadt genai vor!!!!!

canoa, i ha Emmer sgfüehl wenn öper so Jongs scho sooo vell Geld zor verfüegig het, hend doch meistens d eltere no bez öpis dezue ge? glaube wend ned lebsch wine super sparsame-fuchs denn esch das jo fast ned machbar! aso mer hend au kolege päärli wo i eusem alter jez shco es huus hend. aber det sends entweder d eltere gsi wo metgholfe hend bide finanzierig oder si hend vorher johrelang of alles verzechtet dass si sechs hend chöne leischte.... aber wi du seisch, leben und leben lasse. das muess jo schliesslech för si stemme :)

hami grad gfrogt wis echt de Eve goht.... het öper mol öpis ghört wis ehre goht?

Zuletzt bearbeitet am 15.01.15 09:56

• Zitieren

Also mer hend jo au welle johrelang näb de Eltere vo mim Ma boue aber das esch mer eifach znöch, ech wets werklech ned! Darum suecher mer jetzt anders Bouland! Mini Schwegereltere send okay aber ech wet ned näbenand wohne...ond mi Ma seid au, am Obig wot är chönne hei go vom schaffe...ond schöscht wärs grad näbedra...es geht halt au Chond die lüted am 7ni am Obig no oder am Sonntig bi de Eltere wo grad bi de Garage wohned!

Also bi dem Kollegepäärli esch es secher so, em Kolleg sini Eltere send beidi scho verstorbe ond är hed sehr vell chöne erbe ond sini Frou hed au rächt wohlhabendi Eltere...also vo dem här gohts secher!

Mer send jo au scho uf de Bank gseh ond mer chönted sofort afoh boue s Gäld wär ume!
Ond das ganz ohni Eltere!!! =)=) Mer hend scho emmer gspart, hend aber au trotzallem schöni Ferie gmacht etc...Mer spared halt eifach bim Auto, Wohnig etc...

Vor öbe 2 Johr beni vo de Ikea hei cho meteme Badteppich! Denn seid mi Ma, du mer spared doch ufes Huus, dä hätsch jetzt ned müesse choufe! =)=) Ond emmer wenn är weder vo Swisscom TV afoht sägi du Schatz das esch tüürer als e Badteppich mer send doch am spare! =)=)=)

T Eve hed extrem vöu tzue im Büro ond chond chum zom schriebe, es goht ehre sowit guet!
Dänke t Arbet esch secher en gueti Ablänkig!

Wow Dandi Stadtsicht...wo genau hend ehr denn de Bouplatz?

Eusi Ussecht wär denn ufs Moos und uft Autobahn! kkkkk
Aber das stört mi ned so! Mega schön gmüetlech ländlech! =)

• Zitieren