Hallo zäme

Mech wörs mol wondernäh, wie ehr met euchere Vorfreud omgönd?
Bi mer röckt langsam aber secher s'Datum emmer nöcher...

Ond ech han s'Gfühl mech cha mer för nüt meh bruche... ben etz scho total Nervös... Han regelmässig Chopfweh ond mach mer en enorme Drock (ech weiss... ech muen das ganze chli relaxter näh )

aber vorallem schaff is fascht nöm, mech im gschäft z'konzentriere... au jetzt wär ech eigentlech rein theoretish am "schaffe"... aber das forum macht mi fascht söchtig... ond es ged sooooo vell informatione im internet, dass ech emmer weder go stöbere muen... ond mini arbet? die blibt zwor ned ganz legge... aber werd scho rächt vernochlässigt... ond ech versuech mech jo wörkli emmer weder in allerwärtischte z'chlüübe... aber so rechtig glenge tued mer das ned...

goz euch au eso? oder ben ech do grad es extrem?
loschtig... han eigentlech dänkt dass ech meh so die sorte mönsch be wo vo dem ganze "hochziitsfieber" ned agsteckt werd...


-- ~ mer verTRAUED üs ~ -- ~ 21.05.2010 ~ --

• Zitieren

nicht registriert

Hallooo

bi mir geits zwar no chli lenger als bi dir aber ig cha mi o nüm richtig uf ds schaffe konzentriere. nid will ig nervös bi oder so, aber ig ga vil im internet ga stöbere u recherchiere... mues sägä, bi froh, isch der chef diä wuche ide ferie gsi, so gseht är nid, wiä wenig ig eigentlech gmacht ha. aber vo nächst wuche a, pfiift de wider ä andere wind - villich

villich wär bi dir wider mal äs "anty-hochzyts-wucheend" nachä. paar tag ga wellnesse u ds hochzyt la hochzyt si

lg

**Zivil: 20. August 2010 * Kirchlich: 28. August 2010**

• Zitieren

nicht registriert

psssst das sägä mir niämerem, wiä lang das mir effektiv gschaffet hei

meinsch je ender dass dir das organisierts heit, umso besser ig bi ja gspannt wiä ig im juli tuä, wes bi mir numeno ä monet geit. mengisch hani itzä scho chli nervositäts-schüb.

ig wünsche euch emel äs produktivs wucheend und vil spass bim relaxe

**Zivil: 20. August 2010 * Kirchlich: 28. August 2010**

• Zitieren

hey ihr zwo

chan eu jo sooo nofühle, hani jo au scho uf facebook gschribe :-) mi würd das alles gar nöd störe, wenn i jetzt nöd sonen stress demit het dass i mit minere masterarbet dringend mues afange bzw. mi endli iläsä. im gschäft gohts bi mir no, denn hani anderi um mi ume. aber dihei, wenn i sött mit viel disziplin mich dähinter klemme, wirds ganz schlimm. v.a. hetti momentan nur scho ohni hochzit fast zviel umd ohre, drum empfindi es ganze hochzit momentan als total stressig. eifach mol zwo wuche nünt dämit ztue ha, das wär nice. aber ebe, es goht nöd. däfür fehlt no zuviel. und i möcht eigentlich ab afang juli nünt me möse tue, sodass i denn immerhin no 8 tag weniger stress han :-)

würdi nomol afange plane, würdi me zit und finanziells iplane zum ide planigs phase mol no id ferie zgoh, dä kopf frei becho. dihei ish es unmöglich :-) gsehn nur scho di ganz deko immer. hehe.

tschüss ihr zwo, mues go schinkegipfeli mache. mer hend inere stund pfarrsgspröch. nervös macht :-)

• Zitieren

hoi fraue,

dito - ich mues grad schmuntzle wenni üchi biiträg lise. i mim chopf lauft bildlich gseh immer und immer wider sowas wiene hochziits-film ab und es gid sälte e tag woni nid öppis erledige, noh abkläre und noh a de chliinigkäite umechnüüble bis es denn perfekt isch.

naja im gschäft isch das sone sach ... ziitlich und vo de arbet här chöntis mer nid läischte, hät wäis gott nid was woni drin stecke ... aber naja mini muusbewegige gönd doch es paar mal am tag uf internet-explorer und naja, woni denn lande chönder üch ja dänke.

denn chumi häi, laufe is schlafzimmer hinder und jedesmal a üsem hochziits-zimmer verbih. äifach alles voller deko, baschtlete sache wo parat sind und süschtigem zügs wo für de grossi tag parat stönd. auso isch dehäi dä bsundrig tag au immer presänt.

@chliini usziit: ich ha e wuche vorem hochziit ferie und gah denn noh mit minnere trauzügin chlih id toskana oder is tessin (oder wos üs denn je nach wätter ane verschlahd) go usspanne. je nach lust und laune - uf das fröi mi noh rüdig!

@carmile: muessch denn vo dim pfarrsgespröch verzelle. nimmt mi doch es bitzeli wunder was ier üch für d`trauig so alles usdänkt hend: welle bibelspruch, was für lieder, evt. en gschicht usw. am beschte grad en nöis thema eröffne, demits kes durenand mit em thema vom seeletaenzli gid

• Zitieren

Ich chan eu au meeega nahfühle. Bi eus gahts ez au nur no en Monät und sit mir de Ziitpunkt überschritte hend, bin ich nur no hibbelig. Ich schlafe schlecht, ich mach mir selber en mega Druck, ich chan fast nüme normal ässe. Aber glichziitig ischs au immer wieder es mega Chribbele im Buch, wo eifach nur schön isch.

Ich mun zwar würki sege, ich mag ez echt langsam nüme organisiere und a alles denke. Mir sind sit fast 1 1/2 Jahr am organisiere und wenn ich zrugg denke, denn isch das eifach viel z viel Ziit gsi. Ich han ufghört zähle wie oft ich mini Meinig über Musikuswahl, Deko etc wieder gänderet han. Und wells mich würki langsam scho fast nervt die ganz Ziit a d Hochziits denke und was mer no münd oder sötted, han ich mir ez gseit, es isch scho fast alles organisiert, ich mach mich ez eifach nüme nervös, freu mich uf de Tag und uf eusi Gäst und mach mir echt kein Druck meh. Es isch eh alles scho so perfekt organisiert vo eus und vo de Trauzüge da chan jetzt würki nüme viel schief gah....Min GG haltet mich sust glaubs nüme so guet us

Ich han eifach wiä langsam kei Energie und Nerve meh und bin eifach froh, dass mir jetzt die letschti Ziit nüme viel münd mache. Schlussendli wirds denn sicher wieder doch en Stress, aber so für de Chopf muni ez würki mal chli abeschrubbe



Am 05.06.2010 wird euse Troim wahr

• Zitieren