nicht registriert

Hoi zämme

Tüend ihr eigentlich au no recht vieles nächst Jahr afange/erledige oder schlüsset ihr s'meiste scho das Jahr ab? Mir händ jetzt mal s'Grobe fertig und mit dä Details wänd mir erst nächst Jahr afange. Jetzt häts mich mal Wunder gno, ob mir echt nächst Jahr no in Stress cho werdet oder ob ihr das au so machet?

Lg

Manuela

Mir trauet üs am 29.05.09 & 06.06.09

• Zitieren

Hallo Manuela

Bi zwar kei Mai/Juni Brut meh (mir hürote am 3. Juli), aber das chunnt ja zytlech ou öppe häre.. auso mir plane viu erscht ab nächschts jahr. mir mache dass mr no bis ändi november ds restaurant und der ort fürs apero reserviert hei, und wei bis änds dezember di definitivi gästeliste ufstelle, damit mr när im Januar chöi d Iladige uselah, aber der räschte mache mr alles erschts nächsts jahr..
auso überlege und umeluege was me so chönnt, dass mache mr scho jetz (mehrheitlich zwar ich als min Schatz), aber definitiv entscheide düe mr no nid.. i hoffe de nid, dass mr no stress hei, aber i dänke nid..

lg, Aengeli


Mir freue üs uf üses Hochzyt am 3. Juli 2009

• Zitieren

nicht registriert

hallo manuela

das isch genau s problem wo ich im moment han...
ich weiss nie ob ich jetzt na z früeh bin oder ob jetzt a de ziit weri zum d sache plane...
ich mache vorzue mal chli öpis....
was hend ihr scho alles und was staht als nächsts uf em plan bi eu?

aktuell isch bi eus grad:

iladigstext zämestelle und e druckvorlag erstelle
ehering
blumen deko
tischkärtli
menükarten vorlage
flitterwochen

• Zitieren

Hallo zämme.

ich bi a immer unsicher, was i scho alles mache söll. Uf dr einte Sitte han i super viil Idee und ka fascht nid warte das alles z'mache und uf dr andere Sitte isch doch eifach viil zfrieh. Grad so Bastelsache, die staube doch denn nur a.

Also mir hän gmacht:
Kirche, Pfarrer, Organist
Apérolocation, Restaurant
Save the dates usegschickt
Text für Iladig
Homepage gmacht
Hochzitkleid, Schmuck und für ihn dr Azug fürs zivile kauft
Fotograf buecht

Muess me Flitterwuche scho jetzte bueche? Wie frieh im vorus ka me das mache? Mir würde denn nämlig erscht im Oktober oder so go.
S'Gliche Problem han i mit em Oldtimerbus für d'Gäst. So lang i nid weiss, wieviil Transport bruche, kann i doch no gar nüd reserviere. Oder?

Negscht wuche mahce mer föteli für d'Iladig und denn könne mer dört witermache. Ah, ich bi so ungeduldig, wött am liebste scho alles mache

• Zitieren

Hallo liebi Vorbereitigswüetige

Also mer hüroted am 23. April zivil ond am 02. Mai cherchlech. Ond ech darf met Stolz behaupte, dass mer scho rächt vell händ chönne erledige. Well das wo mer jetzt scho cha abschliesse oder organisiere, chamer scho ab de "To-do" Lischte striche. Wett of kei Fall no in Hochziitsstress cho!

Be üs stoht eigentlech (fascht) alles scho:

Termin zivili Trauig met aschliessendem Apero ond Ässe
Termin cherchlech met Apero ond Fäscht.
Chele, Pfarrer, Musig (Orgle ond Chor), Dekoration macht mini Gotte
Chleider för s zivile ond Cherchleche mit allem dromm ond draa
Band förs Fäscht
D Fotografin
D Chärtli verschecket mer am 1.Dezember (sind no fliessig am Couverts aschriibe)
Am Mäntig gömmer wäg de Hochziitstorte go luege

Ab em 1. Novämber chömed die neue Feriekatalög use. Denn chömer au s Hotel bueche. Das mer of d Maledive wettet hämmer scho lang gwösst.
Üsi Reng gömmer am 6.März go sälber schmede imene Rengatelier in Winterthur.
Was mer för Blueme wettet wössemer eigentlech au, aber öber d Farb semmer üs nonig einig. Aber do lömmer üs gärn no vo de Floreschtin berote. D Teschdeko mach ech sälber met minere Gotte zäme.

Es bliibt also no s Ehevorbereitigsgspröch met em Pfarrer, üs förs Zivile amälde of de Gmeind, nomol en chlini Setzig met Restaurant, Fotografin ond Bäcker.
Dänke mer chömed guet öber d Rondi.

Mini besseri Hälfti werd äbe Metti Februar no 30i. Ond das sett scho ned grad ondergo vor luuter Hochziit.

Also ech wönsche euch no gaaaaaaaaaaaaaanz vell Freud ond Plausch a euchne vorbereitige ond plange met euch of de Mai 2009!

Liebi Gruess pearl

• Zitieren