Hallo Zäme

Ich hätti gärn mol euchi Meinig zumene Thema gwüsst. Und zwar isches so, dass ich 23i und mi Maa 31i isch. Mir händ dä Summer ghürotä und sind eifach nur überglücklich. Mir beidi schaffe 100% und ziehnd im Januar in unseri 4,5 Zimmer Eigetumswohnig. Das also churz zu uns....

Sit dr Hochzyt im August macht sich bi mir immer meh e Babywunsch breit
Sobald i e schwangeri Frau gseh oder eifach e chlises Chind fang mis Härz avo rasse.
Ich ha scho immer gwüsst, dassi nid all zu spot möcht Mami wärde- aber was haltet ihr devo mit 23/24 Mami z wärde? Was für Vorussetzige bzw. Vorstellige händ ihr ka, bevor ihr avo "üebe" händ?

Sorry, ich weiss es isch bitz persönlich, interessiert mi halt aber wirklich sehr!

• Zitieren

Liebi Muamba

Aus ersts mou härzlechi Gratulation zor Hochzig.

Auso ech gseh das relativ locker, do mini Eltere genau i de gliche Situation gseh send wie du/ehr.

Ech be der Meinig dass das ned e Frog vom Auter esch. Mer muess sech eifach bereit fühle ond wenn du bereit besch ond di Ma ou esch doch das die best Vorussetzig. Ond es muess för euch stemme för niemert anders...

Ech gloube mer cha das au ned so pauschal beantworte, es esch eifach wechtig dass ehr dröbert im klare send, wie wo was met Chend werd si ond wie ehr euch das vorstelled...de chonds ganz bestemmt guet...

wönsche der alles Gueti!

• Zitieren

Hoi Muamba,

Ich find vorallem durch eue Altersunterschied garnöd „komisch“ wenn ihr jetzt Chind wetted. Jede chan das ja so oder so mache - wiener wott. Oder häsch du Angst vor de Reaktione i dim Umfeld? Jungi Eltere ha/sie isch doch mega lässig wenn mer sich bereit fühlt und’s sich so ussueched. Ich han es sehr jungs Mami und Papi (sie sind jetzt beidi 45 und ich 23gi) und ich finds s Beste wos git. Wenni den mal ussueche chan will de Rest (für mich) passt - Finanziells, Wohnig oder Huus, Bruef vom Schatz und mir - den würdi mi sofort defür entscheide.

• Zitieren

E cha das scho irgendwie nochevollzieh, dass du dir Sorge machsch wägem Umfeld. Aber schlussendlich esch es euchi Entscheidig und es mues NUR für euch stimme. Und du besch jo nümme 16i oder so, und di Ma esch immerhin au scho 30gi gse.

Los uf dis Härz und lueg nid uf die andere!

• Zitieren

hallo muamba! au vo mer natürli alles gueti zor hochzit ;)

ich fende jez 23i ned sooo jong. wennd jez 18ni wersch de wördi der auä au dezue rote no bezeli zwarte. ;) aber met 23i denki esch me scho ordendli erwachse :)
wechtig fendi eifahc dass me sech d konzequenze bewosst esch. dass halt das Baby ned Emmer schnügelig und herzig esch. sonder dass es sehr vel arbet esch und halt au en belaschtigong förd bezihig so wie au finanziell.
aber wenn me sech dem bewosst esch und ned met enre rosarose brille a die sach äne goht denn spricht doch nüt degäge met 23i mami zwerde! ;)
wi du scho seisch, es cha jo au si dass es erst i 2 johr ischloht, das weiss me jo nie...
und spröch usem omfeld chöme so oder so Emmer. i be jez de 28i und ghöre jez scho vo allne site "und? wenn eschs so wiit? wenn geht's es Baby?" und bi der und dim gg sends halt au so dommi spröch eifach i desi rechtig!
und spröch vo wege, gnüss dis lebe nochli, blablabla.. es esch euches lebe und ehr döfet da so gstallte wie ehr das möchtet! und wenn ehr 2 euch es Baby wönschet, denn machet doch es Baby ;)
of was i use wet esch, dass egal wie ehr euch entscheidet, es wird so oder so Emmer öper ge wo anderer meinig eshc und euch das au wird ine dröcke! aber wie scho gseit, wenn ehr de wonsch hend, denn dönd euch doch de au erfölle ;)

wönsche euch of all fäll alles alles gueti z2te (oder bald z 3te...?)

• Zitieren

@Muamba Wenni euch wär würdi eifach dPille absetze und afa Fohlsäure näh und dr räst em Zuefall überlah. I finde du bisch imne guete Alter zum Kind becho und weni i dim Alter scho dr richtigi Maa gha hät, hätti ou grad Kind übercho. Jetz isches halt andersch cho und i ha bis 31gi müesse warte. Aber jetze....
Di Maa isch ja 31gi auso ou im beste Alter zum Kind übercho...eifach druf los wär mini Meinig.

• Zitieren