| Lady Comp, Daysy |
|
|
1 .. 5 6 7 8 9
|
daenu16  am 15.10.2014
Re: Lady Comp, Daysy
Gratuliere Elea, das sött mir au passiere 
Ich benutze d'Daysy sit chli meh als 3 Mönet. Wie bide Ailuj chunnt bi mir au kei hormonelli Verhüetig meh in Frog. Ich hans eifach uuuh schlecht vertrait.
Mir hend vorher 4 Jahr lang mit Kondom verhüeted und versueched sitem April schwanger z'werde.
Bide Daysy chammer ja istelle ob mer wett schwanger werde oder nöd.
I bi sowiet z'friede, aber s'Compüterli brucht scho recht lang zum de Körper kennelerne. I wüsst nöd obis öppertem würd empfehle wo uf kein Fall wett schwanger werde...
|
|
|
elea  am 15.10.2014
Re: Lady Comp, Daysy
nei wenn e Schwangerschaft e weltondergang wer, denn wördi s temp messe definitiv au ned empfähle... för eus eschs e öbergangslösig gsi wo halt de schloss entli chörzer worde esch as denkt.
daenu, i scheck der min pearly, de hesch Emmer sex ade grüene täg ond i 5mt besch schwanger nei seich  aber es stemmt scho, es goht recht es wiili bes eim s grätli kenne lehrt.... aber das esch en art au verständlich... au wenn me en sehr regelmässige Zyklus bzw tempkurve het, eschs emerno mega heikel und empfindlich..
|
ailuj  am 15.10.2014
Re: Lady Comp, Daysy
wenn me sicherer wett si chiem i däm Fau eifach no d'Chupferspirale i Frag...oder heit dir no e Idee? D'Froueärzti het mir die dä Summer wöue ichetue, aber i weiss nid obi sone Frömdkörper i mir wett. Usserdäm ghört me ja o immer wieder, dass es Entzündige cha gä u teu när Fruchtbarkeitsproblem chönn ha, wenn me de mau Ching wett...
|
|
Sarah_Honey nicht registriert am 15.10.2014
Re: Lady Comp, Daysy
Zu de Kupferspirale: Ich bin grad vor churzem bi de Fraueärztin gsi, will ich d'Pille nüm wet näh (weg de Nebewürkige, han sehr sehr hüfig Migräne). Sie hät mir jetzt d'Kupferspirale wärmstens empfohle, halt au wills sehr unkompliziert isch, wän sie eimal drin isch muessme a nüt meh dänke. Sie hät mir jetzt au nöd gseit das es dän chönt Fruchtbarkeisproblem oder so gäh und sie weiss das mir mal Chind wetet ha. S'einzig wo sie mich gwarnt hät isch das s'iisetze recht schmerzhaft chön si bi Fraue wo na nie gebärt händ. Aber janu mit däm muessi wohl läbe.
|
elea am 15.10.2014
Re: Lady Comp, Daysy
erfahrige selber hani net met de chopferspirale, aber sehr vell vorbehalt...
i kenne öper wo si super vertreit het ond nie Problem gha het. aber de nach paar johr met spirale glich schwanger worde esch. de eint Arzt het ehre empfohle d sipirale sofort usezneh wels s chend chönt gfrörde. de ander Arzt het gseit, me sell si denne lo wells useneh vode spirale di grösser gfrohr förs chend sig asd spirale selber. aso het si d spirale denne glo und s chend wege dem ide 25igste Woche verlohre... en abslute Horror.... wet ke panik verbreite oder so, es goht do jo schliesslich um en erfahrigsustusch. und das esch das woni kenne us mim Umfeld. s positive dra esch natürli dass si johrelang erfolgrich met de spirale verhüetet het und nie Beschwerde gha het. schliesslech chame jo au bide pille schwanger werde. e 100%ige schotz geht's jo nie...
|
nala05  am 15.10.2014
Re: Lady Comp, Daysy
*ineschliich*
eventuell isch d jaydess für öpert au no en idee, es isch zwar e hormonspirale, aber sehr nidrig dosiert.
Es gits se erst sit afangs däm joor au in dr schwiiz (im räst vo europa z.T. scho länger) und het "nur" lgälbkörperhormon und keini östrogen din.
Ich weiss ihr redet vo hormonlos, ha abr dänkt vilicht isch das für öper jo au e variante. Ich ha se vor knapp 2monet isetzte loh und bis ez ischs top. S isetzte sälber het scho jid grad spass gmacht, isch aber ushaltbar gsi. Vorteil isch au das d jaydess kleiner as die übliche spiralene isch..
P.s. Ich find das mit dr tempratur mässe sehr intressant, mir persönlig wärs as vrhüetigsmittel eifach z unsicher, zu de körper kennelerne und as schwanger-wärd-hilf ischs sicher supi.
*useschliich*
|
nisliker am 16.10.2014
Re: Lady Comp, Daysy
hey nala
das tönt uu interessant und ich denke so sache werdet in zuekunft no mega vortschritt mache!! ich het eifach nochli respekt wills es noni so lang git... aber finds e gueti sach!
grüessli
|
nala05 am 16.10.2014
Re: Lady Comp, Daysy
Nisliker
Ich ha au zerst chli zwiifel ka wils idr schwiz noni so lang git. Aber ebe in dütschland isch si scho länger uf em märt und si isch vom gliche härsteller wie d mirena.. Das het mi de widr biz beruhigt.
Nach 6 wuche gohts mr uf jedefall guet.. De schutz sött jo scho au gwährleistet si.. Hihi susch gits den halt es jaydess-baby  nei.. Das wär uf jedefall nid de plan.
Gruess
|
Broncos am 03.11.2014
Re: Lady Comp, Daysy
Nisliker: Ich verstah ned ganz, wieso de Daysy für dich wertlos worde isch, nur will d Elea schwanger worde isch demit. Das s Risiko biz höcher als bide Pille isch, isch ja klar. Und d Elea ghört halt eifach zu dene wenige Prozent, wos halt ned sicher gsi isch. Für mich würs erst nutzlos werde, weni jetzt plötzlich vo x Fraue, wo trotz verhüetig bi rote Täg schwanger worde sind wür ghöre.
Ich han bis jetzt gueti Erfahrige demit gmacht. D Temperatur isch zwar recht am schwanke, aber han mitlerwile dusse, wie sie uf was reagiert. Mer gseht vor allem amigs die zwei Täg woni am morge früeh traniere und drum scho am 5.15 ufstah, anstatt wie suscht amigs am 6.30.
Weg de Spirale: Ich han sie mir vor es paar Jahr mal welle isetzte la. Isch en komplette reinfall gsi. Ich bin währed em isetzte ohmächtig worde und woni wieder ufgwached bin, hani üüüübelsti Schmerze gha. (Han mer scho d Bänder grisse, aber das isch nix gsi degege). De FA het mer den Schmerzmittel gä und nachere Stund nomal, isch aber gar nüt besser worde und nach zwei Stund het er sie wieder usegnah. Vo dem Moment a sind d schmerze weg gsi. Das ganze het min Körper aber so gschwächt, dasi nüm elei hei han chönne und min GG mich het müesse abhole und ich bin nachher es paar Tag chrank gsi. Ich wett üch demit kei Angst mache, es git ja gnueg Bispil, wos keis Problem gsi isch, aber ebe, chan au en echti Belastig für de Körper si.
|
nala05 am 13.11.2014
Re: Lady Comp, Daysy
Broncos: Dini Erfahrig mit dr Spirale isch ächt Schei*** gsi! aber ebe d jaydess isch um einiges kleiner as d mirena oder d kupferspirale, was bim iisetze sicher weniger schmärze vrursacht. i find ebe wen meh chli googlet liest meh nur horrorgschichte und fast nüd guets. drbi isch das wohl eher d usnahm as d regle... natürlig isches kei spaziergang die iizsetze und natürlig hets weh gmacht, es isch jedoch uf jedefall bi mit z ertrage gsi.
aber ebe i will uf kei fall dini erfahrig abespiele, nur sage dases au gueti erfahrige git
|
|
|
1 .. 5 6 7 8 9
|
Anmelden
