Hallo zäme

Ich han mi ez endli chöne an Laptop setze um min Bricht zschriibe vo minere Traumhochziit.

Es hät alles aagfange, woni min Maa verabschiedet han am halbi 6i am Fritigobig demit er zum Hotel chunt. Bald druf isch mini erscht Bruutjungfere bi mir iitrudlet und ich han dNochricht übercho, dass es Problem uftauch säg und mini Trauzüügin und e wiiteri Bruutjungfere beidi erscht später zu üs stosse werdet. Ich han mr natürli kei Gedanke drüber gmacht und di zweit Bruutjungfere isch uftaucht bi mir. Naja, mir händ denn e chli umetrödlet, wils scho zspät xi isch zum go zbade, aber mir uf di andere händ wölle warte bis mir öbis zum zNacht bstelled. Churz vor 20 Uhr hämmer erfahre, dass es doch no länger goht und mir selber öbis sölled go hole. Schlussendli sinds denn am 10ni zNacht cho und mir händ gad emol Ziit defür ka, dass ich allne 4 dNägel lackiert han und mir churz es Peeling und e Tonerde-Maske händ chöne druftue bevor mir alli denn am 1 am morge is Bett sind. Mir händ alli bi mir i de Wohnig übernachtet.

Leider hani nöd so schnell chöne iischlofe, wil mir immer wieder Sache in Sinn cho sind für de Morge, aber irgendwenn hät mi de Schlof überrumplet und i ha chöne iischlofe. Ich vermuete churz deno hät mi mini Bettgenossin miteme luute Hueschte is Ohr gweckt. Und denn isch dHueschteparade losgange... Ich han zum Glück Hueschtepastille immer i mim Nachttischli und nach 2 devo hani min Chopf under sChüssi gleit und han endli chöne iischlofe. Ich cha niemr zum Bett useschmeisse, das liit mir eifach nöd, obwohl sie mir xeit hät, ich chön sie scho uuseschmeisse. So bini halt.

Am 7:20 bini denn wieder verdwached und all sind no am Schlofe xi, de Wecker vo de erschte Bruutjungfere isch ersch am halbi 8ti losgange.

##Zivil am 10 Juni 2010 -- Trauung am 10 Juli 2010##

• Zitieren

Ab dem Ziitpunkt isch alles schnell vorbiigange und ich weiss nöd, wo die Ziit ane isch. I bi churz go de zMorge hole und i de Zwüscheziit sind di andere go dusche.

Ich han e Lischte gmacht für alli Mädels, wer wänn nachenand dusched, frisiert und gschminkt wird.

Um 8:20 sind dCoiffeuse und Assistentin uftaucht und sie händ sich rasch installiert. Sie hät sofort aagfange mit iilegge und frisiere. Am 9ni sind mini Eltere cho und churz nacher isch dVisagistin cho und au sie hät sich rasch parat gmacht und hät sich ans Schminke vo 6 Fraue gmacht. Min Vater hät alles dokumentiert und di andere händ au alli Fotene gmacht.
Ich han churz e chli Herzchlopfe ka währed em Frisiere und wieder bim Schminke, wili mir vorgstellt han, wie bald ich im Chleid bin und ich bald min Maa vorem Altar xehne.
Mir sind alli churz noch de 12i fertig xi mit allem, dCoiffeuse und dVisagistin händ sich verabschiedet und mir händ üs aagfange aalege. De Photograph isch denn cho und zwar genau woni fertig xi bi.
Ich han mini Underwösch aaleit und alli mini Mädels händ mr gholfe is Chleid inezschlüfe und alli Chnöpf hinde iizhänge. De Photograph häts sehr luschtig gfunde händ hät alles suber dokumentiert. Denn hani dHauptprob für dToilette wölle dureführe und han alles erfolgriich in Reifrock inegstopft, woni gmerkt han, dass ich min Slip nöd ha chöne abziehe, wil mir dStrümpf verchert aagmacht händ. Tja, denn hani 2 Bruutjungfere zur Hilf grüefe und sie händ mr schnell under de Rock müesse dStrümpf neu an Halter anemache. Nocher ischs endli gange zum ufs WC zgoh

Nacher hämmer churz es paar Gruppefotene gmacht mit mine Eltere und mine Mädels, händ alles uuspackt und sind zur Wohnig uuse. Det hät scho de Londonbus gwartet uf üs. Vo dem Augeblick hani nur no ei riese Freud ka und bi gar nümme nervös xi!

DBusfahrt isch genial xi. Alli Lüüt uf de Stross und i de Autos händ üs xeh und gwunke oder ghupt. Es isch schön xi dRoute am Zürisee entlang zfahre und mir sind sogar öbe 10min zfrüeh aacho. Di letschte Gäscht sind nämli aacho und ich han mi müesse im heisse unklimatisierte Bus verstecke. Mir händ aber dBruutfüehrer loh cho mit de Strüss vo de Bruutjungfere und de Aastecker für mini Eltere. Min Maa isch aber so nervös xi, dass er min Struss ebefalls mitgeh hät, obwohl er mir de Struuss sött vorem Altar überreiche. Woni ihn xeh han, bini überwältigt xi. Er isch so schön und schlicht und elegant xi, eifach traumhaft. Naja, denn hani xeit ka, dass sie ihn sölled bi mir loh, das sei keis Problem für mi. De Trauzüüge hät aber de Struuss wieder ufeträge loh vo mim Mami. Ich han eifach nur glached und denkt, jänu.

Wo alli Gäscht gsesse sind händ mir aagfange de lange Wäg zum Altar aaztrete. Mini 4 Bruutjungfere mit de 4 Bruutfüehrer und ich und min Vater am Schluss. Mir händ öbe 100m müesse laufe, wovon mr aber sicher 50m üs vorher xeh hät. Woni dDekoration xeh han, sind mr eifach nur Träne cho. Min Maa hät das so toll organisiert mit de Floristin und sine Helfer. Es hät alles eifach nur wunderschön uusxeh. Genau so, wienis mir vorgstellt han. Nöd emol de silberne Pavillion isch mr ufgfalle im Schatte, er hät wiiss uusxeh. DMusig hät scho aagfange ka und woni di hinderschte Reihe xeh han und es paar unerwarteti Gäscht xeh han, sind mr gad Freudeträne cho! Sie sind aber schnell weggange, wil min Maa sini verdunkelti Brille aaka hät und vom inelaufe vo de Bruutlüüt gar nüt mitübercho hät. DInfo, dass ihm dBrille abgno wird, wenn mir am Gang entlang laufed isch leider nöd durecho. Naja, ich han min Vater i de Mitti aaghalte, demit ihm dBrille abgno wird, demit er mich e chli xeht abelaufe. Es isch mr trotzdem alles e chli schnell gange, aber es isch mr au vorcho, wiene Ewigkeit. Ich han sowieso nur ihn xeh!!

DTrauig isch wunderschön xi. Er hät sehr vil Humor inebrocht und währed de Gäschtewünsch, hani so müesse weine, wil all di liäbe Lüüt an üs vorbiigloffe sind und ich so Freud ka han alli wiederzxeh! Ich han ez scho wieder nassi Auge bim Schribe. Es isch so ne unbeschrieblichs Gfühl xi alli Gäscht zxeh und im Stille für üs en intime Augeblick zerlebe mit jedem einzelne.
Denn isch dTrauig fertig xi und mir händ e roti Rose vorbereitet ka, demit ich und min Maa im Tango-voruus-Schriitt zu üsem erwählte Tango uusegloffe sind. Alli händ dIdee mega witzig gfunde und alles hät glached. Das isch genau üsi erwarteti Reaktion xi und mir händs total genial chöne dureziehe. Somit händ mir üs zu de Gratulatione chöne ufstelle und die, wo scho xi sind händ direkt zum Apero chöne. Es isch echt mega genial xi und trotz dene viele Küss, woni verteilt han, hani no vil meh ka zum vergeh!

So, ich sött langsam is Bett, ich han di letschte 2 Nächt nöd so vil gschlofe. Ich hoffe ich han Ziit zum morn no zschriibe. Sus am Mittwuchobig, wenni wieder zrugg bi vo üsem Wellness-Churzurlaub :)


##Glücklich ghürote! 10 Juni 2010 -- 10 Juli 2010 2 perfekti Täg##

• Zitieren

liebi cosmologia
ich gratulier dir au ganz herzlich und wünsche eui für eui zuekunft eifach nume s`allerbeschtä


******* Zivil: 27.08.10 & Kirchlich: 4.09.10 *******

• Zitieren

au ich danke dir für dä schön bricht... obwohl do no en teil fehlt, isch es wunderbar gsi zum lese, wie ihrs gha händ...

freu mi ufd fortsetzig und no eis, zwei föteli ?!?

gnüsseds und ganz herzlichi gratulation!!!

<3 Unsere Grossen Tage: zivil 10.09.2010 und kirchlich 11.09.2010 <3

http://hochzeitscountdown.com/"][/url]

• Zitieren

nicht registriert

Liebi Cosmologia,
danke, för de Brecht. I ha am Samschtig mängisch dänkt, we wit send si ächt....
I wönsche euch vo ganzem Härze alles Liebi ond gueti of eurem wittere gmeinsame Läbenswäg....
Es härzlechs Grüessli Franziska

26. Juni 2010, unser schönster tag....

• Zitieren

Danke vilmol für die liäbe Wort und eui Glückwünsch. Ich chume also zum Teil 2

Nachdem mir alli Gratulatione entgegegno händ isch dPianistin zu üs cho go gratuliere. Sie hät verzellt, dass sie andauernd vo Breme gstoche und gstört worde isch bim Spile. Vo dem hani bim Spile selber nüt mitbecho. Sie häts aber sehr mit Humor gno.
Ez hani endli uf dToilette chönne, hät scho müesse goh, wo mir aacho sind mitem Bus. Leider häts nur ei Toilette i de Waldhütte ka und es isch mr leider nöd mögli xi zum vor de Trauig zgoh. Mini Mädels händ mr leider verbote mit dem Chleid im Wald zgoh
Mir händ also chli Ziit ka zum mit üsne Gäscht aazstosse und mit es paarne zschwätze. Denn sind dGruppefotene losgange. Üsi Koordinatorin hät leider vil nöd kennt, aber sisch trotzdem recht schnell gange und inkl. Gruppefoti hämmer alli früehzitig erledigt ka.

Nacher isch de Ballonwettbewerb gstartet worde. Leider isch sHelium sehr schnell us de Ballön uusgwiche weg de Hitz und sie sind nümm so prall gfüllt xi, wie am Morge. Di meischte Zettel händ 2 Ballön bruucht, demit sie abgfloge sind. SKomando isch cho zum losloh und dHälfti vo de Ballön isch wieder abecho, di ander Hälfti isch gaaaaanz langsam gstiege. Alli händ sich boge vor Lache! Es isch so luschtig xi. Wo sie aber erfasst worde sind vo de Thermik, sinds rasch gstiege und händ sich aafoh verteile. Das isch en witzige Patzer, wo alli sehr luschtig gfunde händ.


##Glücklich ghürote! 10 Juni 2010 -- 10 Juli 2010 2 perfekti Täg##

• Zitieren