Hallo Zäme

Äs geit no chli weniger aus es haubs Jahr u de hei mir üsi Zivili Hochzyt u no chli meh aus es haubs Jahr u de hei mir üsi Chirchlechi Hochzyt, u drum eröffni iz hiä ou mi eiget Tread

Eckdaten
Zivile Hochzeit: 31. Juli 2014
Kirchliche Hochzeit: 30. August 2014

Üsi Gschicht
Mir hei üs vor 10 Jahr lehre kenne und fyre am 1.8.2014 üse 10. Jahrestag. Drum isches für es passends Jahr zum hürate
Mi GG het mir dr Atrag bi üs Daheim gmacht.. für mi völlig überraschend u das hätti niä dänkt.. wüui scho lenger eigch druf ghoffet ha..

Brautchleid
Ig ha letzt Wuche MIS Troumchleid gfunge Äs isch wuuuunderschön, ä Troum
Ig bi am Morge mit mire TZ, mim Mami u mim zuäkünftige Schwiegermami im Tessa&Thomi in Thun gsi... Mir si hingere güährt worde womr ä Ecke schön für üs hei gha, mitere Kabine u amne Riiise Spigu Mir hei ä super gueti Beratig gha... ig ha chli gseit wasi i mir vorstelle u mir hei när zäme Chleider usgsuecht wo mir hei gfaue.... bi eim mit ganz helle rosa Rösli hani gfunge, eher nid wägem rosa...
ig ha när afa probiere u zerset Chleid hetmr scho mega guet gfaue.. ig ha när ume diä 10 Chleider probiert u dVerchöiferin hetmr ou ehrlech ihri meinig gseit.. u mini Begleiterinne natürlech ou dVerchöiferin het när ou gli mau vou mi Styl gfunge u gwüsst was mir so gfaut.. u de het si gseit, so iz probiere mir glich no das mit dä helle Rösli..
i has agleit bi vore Spigu u ha gseit "wow" ä Troum das Chleid...u es isch eigch klar gsi.. das Gfüu i däm Chleid hani schüsch niäne gha
ha no paar angeri probiert u zum Schluss nomau das u es eigch klar gsi
ha de gfunge i wöug glich no ga luege am Nami wüu mir scho ä Termin hei abgmacht gha in Huttwil bi Mindermode...
Dert heimr ä ganz jungi Beraterin gha wo säch zwar müäh het gä, aber haut nid wiä diä am Morge isch gsi.. u ha ou bi jedem Chleid dänkt, es isch haut nid wiä das am Morge... u drum isch für mi klar, mis Chleid hani bereits am Morge gfunge äs isch troumhaft


Was mir scho hei
- Zivilstandesam reserviert
- Kirche reserviert
- Apero Catering
- Location Abend reserviert
- Catering Abendesse
- Hochzeitstorte
- Einladungen verschickt
- Homepage

Was mir nächstens müesse mache
- Restaurant für Ziviles reservieren
- Online Wunschliste fertigstellen
- Ringe aussuchen


so das wärs mau für zerste....

• Zitieren

Hoi Mariee

So schön, jtzt hesch Du ou Di eiget Thread!!

Wirde ne uf jede Fall gspannt verfolge...

• Zitieren

Hey Mariee

So lässig hesch din eigete Thread! Bin scho uf updates gspannt
(und s Chleid findi immer no schön , das hani jetzt aber den glaub langsam gnueg gseit )

• Zitieren

So, hüt schribi ou ume mau öpis i mim Thread.

Ig ha letzt Weekend mi Polterabe gha u es isch ächt eifach GENIAU gsi! Mini TZ u mini Froue hei säch sooo müäh gä :)

Auso ig ha gwüsst, dassmr am Abe az Trucker&Country Festival göh, ha das so gwünscht… schüsch hani nüt gwüsst…

Ig ha am Samsti am 13.30 müesse in Münsige am Bahnhof si. Bi scho mega närvös gsi wüui nid ha gwüsst, wasmi erwartet..
Dert het mi mini TZ abghout u mir si ine Park gloffe wo üs auii erwartet hei :) mitemne Glas Champus u mitemne TShirt wo „Mein Name“ Chicks“ isch druffe gstange hei si mi erwartet :) ig ha es Tshirt becho wo druffe isch gstange „Wedding Chick“
När hei si mir gseit, dassmr iz gö ga Töpfere wüu mi GG u ig gad vor churzem es Huus hei kouft, wei si üs auii öpis mache für i Garte
Es isch so gmüedlech gsi u mir heis so guet gha zäme.. auii hei säch chli chöne lehre kenne u mir hei chli zyt gha zum zäme brichte…
Und vorauem, es si soooo tolli Sache drbi use cho… Schöni Sache wiä Röseli u Töpfli und luschtigi Sache wiä es Söili, Enteli und so wine HalloweenKürbiskopf wo de sicher mi GG fröid het ;) u ig ha es Tüürschiiudli gmacht mitem nöiie Name natürlech :)

Nachem töpfere simr gmüedlech dusse am zVieri ässe gsi..hei no besproche wär mit wäm de im Auto fahrt für uf Interlake u när isch ä Töff cho zfahre.. när hets gheisse, ig chöni iz mit däm mit :) soooo cool gsi :) es isch dr Götti vo mire TZ gsi u ig ha när hinge druf chöne u de simr uf Interlake gfahre.. So toll gsi diä Fahrt :)
Bevormr si los gfahre hani e Läderjagge und Helm becho..ha usgseh wine riese Kaste i dere Jagge :D u nä Plan wo dassi när mini Froue zInterlake ume finge..

Nach dere tolle Töffahrt hani när mini Froue gli mau gfunge u de isches witer gange…
Ig ha ä pinkige Cowboyhuet übercho… e riesigi grossi pinkigi Sunnebrille und e pinkige Pistolegurt mit pinkiger Wasserpistole (Föteli finget dir uf Facebook).
När hei si es chlises Leiterwägeli drbi ga mit chline Shots dinne woni ha müesse verchoufe.. muess säge, es isch rächt eifach gange wüu eigch dLüt uf mi zuä si cho :) hei mega Gäud gmacht u mit däm hani mir när dr ganz Abe chöne finanziere…

Dr Räscht vom Abe simr när gmüedlech im Westerndorf gsi, hei no chli tänzlet, si no ga es Konzert luege u de när im Zelt ga schlafe… mir hei zviert dert übernachtet, u dr räschte vo dä Froue isch Hei gange…

Am Sunntig womr erwachet si, si zwo Kollegine zrug cho vom WC u hei verzeut, si heige Type lehre kenne u mit dene abgmacht zum zMorge ässe… mini Begeisterig isch nid gad gross gsi (Morgenmuffel läst grüssen…)
Uf jedefau simr när richtig Zäut wos zMorge het gä u si dert ihne gloffe u dKollegin het sä scho vo witem gseh.. kommischi Type mit Kabutze u ig ha gar nid richtig gluegt wüui gar nid so ha möge…
Womr de bi dene si gseh hani plötzlech gschnall wär ja das isch… Nämlech mi GG u dMänner vo mine Froue :) sooo ä tolli überraschig :) u drzuä hei dMänner auii es Tshirt anne gah wo druffe isch gstange „Mein Name“ Cowboys“ :D ha meeega fröid gha :)
Mir hei de när auii zäme gmüedlech zmörgelet u si no chli dür zWesterndörfli u si de när nachem Mittag mau Hei zuä gange…

Es isch ä ächt genau gsi!

• Zitieren

Hiä ändlech dr Bricht vo üsem Zivile

Ä Tag vor üsere Zivile Trouig bini auso scho chli närvös gsi.. mini TZ hetmr de am Abe vorhär gschribe, ig söui mi de nid närve weni nid cha pfuse sonder diä letzte Stunde aus Frou XY (no mit ledigem Name) gniesse. Das hani de ou gmacht, wüu gschlafe hani nämlech nid guet.. Aber dank däm guete Tipp hani mi ou nid gnärvt ;-)

Ig bi de öpe am 07.00 Uhr ufgstange u bi de när uf diä 08.00 zum Coiffeur. Ig ha no Meches gmacht, dHaar chli gschnitte u när heimr Brautfrisur für de am Kirchleche Testet :-)
U när het si mir am Schluss de no ä mega schöni Frisur gmacht für am Zivile Hochzyt. Für mi isch dä Morge bim Coiffeur super gsi, bi schön abglänkt gsi u när ou nüme so närvös.. Mis Mami ischmr de no es wuuunderschöns Strüssli cho bringe u de heimr sogar no ä passendi Rose id Haar ta :-)

Am Mittag bini no zu mine Eltere öpis chlises ga ässe.. hunger hani zwar nid gha.. Ha nume dänkt, wiä wird de das am Kirchleche? :-/

Ig bi mir när ga parat mache, alege und schminke. Ha mi GG afa gfragt öb är eigch immer no nid närvös isch? U de heter de gmeint ka, mou iz scho afa chli.. ha scho dänkt göng nume mir so ;-) u när si üs üsi Trouzüge am 14.00 Uhr cho abhole. Si hei zAuto mega schön mit Blueme gschmückt ka u mir hei när hinger inne es Tablar gha mit Champus u Nüssli. Mega härzig :-) si hei säch mega müäh gäh :-)

Mir si när uf Thun zum Standesamt gfahre u uf diä 14.50 Uhr si de när diä räschtleche Lüt itroffe. Je üsi Eltere si drbi gsi, mini zwe Brüedsche mit Fründinne u mim Maa si Brüedsch.

dStandesbeamtin isch üs de när cho hole u si isch mir gad vo Afang ah mega sympathisch gsi :-) si isch auii ga grüesse u het chli gfragt wär wär isch u het säch vorgstellt. Mega ä Flotti u ufgstellti isches gsi. U ja när isches los gange mit dr Trouig.. ig bi so närvös gsi, cha gar nid wük säge um was dasses isch gange :-D Si het uf jedefall gseit, es isch wiä mitemne Diamant. Weme diä Ecke u Kante zfest abschlieft hetme schlussendlech nüme dä Stei/Mönsch wome mau het gha.. u ohni Ecke und Kante wäri ä Diamant/Mönsch ja när nüme zgliche..

När heimr müesse ufstah u si het zersch mi gfragt u ig ha Ja gseit. U när het si mi GG gfragt u är het ou Ja gseit u da si bi mir Träne gflosse.. äs isch sooo schön gsi dass är iz wük JA zu mir het gseit :-) sone mega schöne Momänt :-) dr schönst vom ganze Tag :-)

De hei mir no müesse ungerschribe. Mi Maa hetmr de no gseit, söu de mitem nöiie Name ;-) Ha ihm vorhär no gseit är söumrs de säge, dassi vor luter Ufregig nid so fausch ungerschribe ;-) dStandesbeamtin het de no es Gedicht über „Glück“ vorgläse u de si üs auii cho gratuliere… u de si no gad mau Träne gflosse.. Auii Froue hei ömu ou Träne i dä Auge gha.. ;-) vorallem mini TZ u mis Mami :-) ha gar nid richtig chöne merci säge für Gratulatione, so überwältiget vo dene Gfüu bini gsi…

Mir si när use gloffe u dusse hei es paar Kollege u mis Grosi gwartet :-) mir hei de bim Standesamt no agstosse u paar Föteli gmacht. Nachemne Zytli simr de witer u de het dusse uf üs ä Kutsche gwartet :-) ä mega Überraschig :-) u mir hei doch gar nüt erwartet! :-) mir si de ufgstige u si los gfahre..u de fahrt doch dä mitz dür zBälliz düre :-D für di wo Thun nid kenne, mitz dür dStadt düre :-D dLüt hei Gratulatione zuä grüeft u paari hei sogar afa klatsche :-D
Mir hei diä Kutschefahrt mega gnose.. hei dert eifach mau chli Zyt für üs zwöit gha :-) mega schön gsi! Womr bim Restaurant si acho, Parkhotel Gunte, het de üsi Familie u TZ dert gwartet u üs empfange. Mir hei super Wätter gha (was ja nid so sälbstverständlech isch das Jahr) u hei de im Garte am See zApèro gno.. isch mega gmüedlech gsi.. hei de dert ou no chli Fotos gmacht u chli zschöne Wätter gnosse :-)

Speter simr de inne ga zNacht ässe.. BaBouChi, isch öpis ähnlechs wiä Fondue Chinoise.. :-) suuper fein gsi :-) nachem zNacht simer üs no chli ga dFüess verträtte u chli ga verdoue..hei auii zviu gässe gha ;-) hei de nomau paar Fotos gmacht..zLiecht isch super gsi när..
Chli spetere heimr de no Dessert gno..ig ha gar nüme möge.. zum Glück het mi Maa no eis gno. Si hei nämlech zTeller mega schön Dekoriert gha mit üsne Näme druffe :-) mega härzig gsi :-)

Nachem Dessert hei üs üsi Trouzüge gseit mir söue mitcho u de simer use i Garte u füre a See u si hei dert mit Laterne äs Härzli gmacht gha..u mir si de när dert, nume mir zwöi“ ufnes Bänkli ghocket, hei dr See u diä schöne Lämpli gnosse u si eifach nume chli für üs gsi :-) so schön gsi u mega romantisch dert :-) eifach nume mir zwöi :-) super Idee gsi vo üsne TZ :-)

Nachemne Zytli si de auii angere ou no cho luege u de heimr üs de ufe Heiwäg gmacht..
Daheime acho het üs no ä witeri Überraschig erwartet. Üsi Stäge isch dekoriert gsi mit Lampions u a üsere Tüüre si ou no Plakat ghanget u so Fähndli mit „Just Married“ si ou no ghanget! Mega schön gsi :-)

Äs isch so ä wunderschöne Tag gsi! Üsi TZ u üsi Family hei säch sooo müäh gäh! U mir hei doch mit gar nütem grächnet am Zivile..

• Zitieren

La mariee, es dönt so schön und nacheme perfekte dag! Finds mega toll hän sich euri tz's und familie so viil schöni sache für euch usdängt
Bi ez scho gspannt uf di bricht vom kirchliche!

Härzligi Gratulation!!

• Zitieren