Do es jetzt nur no 3 wuche bis zum zivile sin und mi polterobe das wucheänd au gsi isch, hani dänkt eröffne ich ez au min eigne thread

zerst mol zu mir und mim schatz:
mir hän uns vor 10 joor in dr lehr kenne glernt. mir sin i dr gliche klass gsi, und scho wo ich ihn s erstmol richtig gseh ha (mir sin 20 männer und 3 fraue idr klass gsi, do het meh am afang noni so de übrblick ^^) hani dänkt woooow die auge! är het wunderschöni stahlblaui auge, ich lieb se hüt no
anschiinend bin ich ihm au scho vo afang ah ufgfalle (vilicht au wil imene ruum voller männer, d fraue halt usestäche, hihi) aber es isch de rächt schnäll klar worde das mir uns gärn hän. und dä zuestand het sich bis hüt nüm vränderet!
mir hän sithär viili schöni momänt dörfe teile aber au eher unschöni sache miesse erläbe. Nachdäm i vor 2 joor zimli krank worde bi, isch mim gg klar worde das är uf kei fall ohni mi wil si.

und do drmit kömme mir zum atrag:
am 10.09.2012 isch dä ehrwürdig dag gsi. mir sin grad in de ferie in thailand gsi und ufemem bootsusflug durch d pang-nga bucht (wuuuunderschön mit luuter chline inseli in allne forme und farbe) am nomidag simer amene wunderschöne, einsame strand gsi und mir häns uns grad bequem gmacht. uf eimol zieht mi schatz e ring us dr täsche und stellt d froge aller froge! ich bi zimlig baff gsi, aso eigetli richtig gschockt! hät niiiiie drmit grächnet! mir hets so derartig d sproch vrschlage (und das heisst öbis) dasi kei antwort ha könne gäh, ha nur de ring an finger gsteckt und ihn küsst. ha aber us däre situation richtig heiss übrko und die erste wort wo use ko sin, isch gsi: "könne mir is wasser, i ha mega heiss" aber mi gg isch au mega nervös gsi.. är het no ufs "jo" gwartet, ganz vrwirrt frogt är de was den jetzt mini antwort sig. und ich bi ächt nid mi gsi in däre situation und ha nur könne sage "natürlig jo, aber ich mues jetzt ächt ins wasser, mir isch heiss" :o) ändlig chli abkiehlt im wasser, han ich mi de richtig könne freue, s isch sooo schön gsi! mir hän de ganzi räscht vom dag nur no e riiiise grinse ufem gsicht ka! es isch super gsi! und wil mir das gfühl no chli hän welle wiitr gniesse, hämir erst wo mir widr zrugg idr schwiz gsi sin unsere familie die guete nochrichte übrbrocht. das sin super ferie gsi, wo ich nie vrgässe wird.

i dänk das isch mol gnueg vo uns

• Zitieren

let's talk about the big day!
unseri hochzyt wird am 1.august dä summer si, aso in zimli gnau 2 monet. mir wärde e freii trauuig mit aschliessendem apero im Hotel Seeburg z Luzärn ha, wens wättr mitmacht diräkt am see
am obig wärde mir mit de gladene gäscht in hotel Montana wächsle und dört unser fest ha.
Organisiert hämir mittlerwille scho s meiste!
momentani to-do liste seht folgend us:
- 2.Besprechung Florist inkl. organisieren von Väseli
- Besprechung mit Fotografin
- Tagesplan mit den Tz's anschauen
- Programme fertig machen
- Menü endgültig fixen
- Candybar Inhalte besorgen
- Gastgeschenke machen (Limoncello)
- letzte Dekoinhalte bestimmen

Trauuig:
aso ebe d trauuig isch e freii trauuig wo vonere zeremonieleiterin duregführt wird. mir hän uns scho uf e ablauf geeinigt und uns drfür entschiede e liebeserklärig bim jo-wort zmache <3 ich ha mini scho chli im kopf.. hoff fescht dasi das den au schaff :)
mir hän au e bluememeitli und e ringträger, si laufe bi iizug mit ii und sin beides fünfjährigi super härzigi kinder. si hän ihri kleider scho, de bueb wird e graues gilet zumne wiise hemli mit fliege und graue caprihose ah ha und s meitli e kleid mit tüllrock in ivory.
witr hani 2 bridemaids, mini sis und mini beschti fründin. si hän s gliche kleid ah, nämli e marineblaus schulterfreies, langs kleid.
mi vatr wird mich zum altar füre begleite, wo mi gg scho uf mi warte wird.
d lieder wärend dr trauuig wärde vonre bekannte gsunge:
Einzug: The Story, (ab CD)
Your Song
A thousand years
Make you feel my love
To love somebody

Apero:
Unser Apero menü:
Melone-Rohschinken Sticks
Früchtespiesschen
Baguette mit Rauchlachs
Baguette mit Salami
Crostini mit Oliventapenade
Poulet-Satay Spiesschen mit Erdnusssauce
Country Cuts mit Kräuter-Sauerrahm
Frühlingsrollen mit Sweet & Sour Sauce 
Zum trinke drzue gits Icetea usemne Getränkespänder, Wiiswyy und Mineral
Am Apero bini mir no am übrlege obs e unterhaltig brucht… evtl Boccia oder so uslege für die wo wänd..

Fest am Obig:
Am obe simer no 40 lüt und fyyre ebe im Hotel Montana.
S Menü simer nonig ganz sicher, uf jedefall gits aber e dreistöckigi hochzytstorte mit schwarzwälder, vanille mousse und passionsfrucht creme. Die wird in d candybar integriert wo mir personalisierti M&M's, ganz viil schläckzüg, praline mit truffes und baileys füllig, macarons, cakepops unsere gäst abiete wärde.
zur deko hämir hochi kerzeständer und wärde rundume kleini väseli mit wiise rose, schleierkrut, hortensie und etl au gerberas dine. unseri farbe wäre eigetlig violett-petrol aber de saal im montana isch chli orange lastig und mir hän angst es biist sich wen mir hauptsächlig violetti blueme nähme.
zur unterhaltig stoht näbem gästebuech no e photobooth parat, die wärde mit chalkboards usgschilderet.

Zuletzt bearbeitet am 02.06.14 15:46

• Zitieren

Jaay en Nala thread da bini doch debi
Und ja Föööteli und Bricht vom Poletri?! Ich bin doch gwundrig

• Zitieren

Hey Nala

merci für di super Polterbricht
das tönt doch super und dini Mädels hei sich ja vil ifalle lah für di
tönt nachemne perfekte Polterweekend

bi scho gspannt uf meh föteli und details und verfolge gspannt din Thread

• Zitieren

wow so en tolle bricht dönt mega toll dis polterweekend!!! :)))

• Zitieren

Hoi Nala

Danke für Din Polterbricht, tönt lässig!
Mega schön Diner Cupcakes, u cooli Idee mit am T-Shirt

• Zitieren