| Nimbini’s Wintermärchen – Ein Traum wird wahr |
|
|
1 2 3 4 5 .. 13
|
|
Belle85 nicht registriert am 16.10.2010
Re: Nimbini’s Wintermärchen – Polterwoche in Las Vegas
Eifach suuuper 
Do wärde äuä die meischte chli nidisch mech natürlech igschlosse. Eifach toll het die Idee dini TZ ka oder du?
LG Belle
Wir feiern das Fest unseres Lebens 28.05.2011
|
|
|
|
vivala010 nicht registriert am 17.10.2010
Re: Nimbini’s Wintermärchen – Polterwoche in Las Vegas
Merci für din bricht. Han dià ganz zit a dich denkt wa du jetzt gad erlebsch ;0 tönd so mega nach super täg beniede dich gad au es bitz. Wàrsch doch nume butz frühner gflogaä :0 lg
|
|
Jenny78 nicht registriert am 17.10.2010
Re: Nimbini’s Wintermärchen – Polterwoche in Las Vegas
Hey Nimbini
Da chan ich mir nur dä anderä aschliessä, da hesch würklich lässigi Täg gha und es tönt nachemä riesigä Chäferfescht  Cool, dass au no Dis Chleid gfundä hesch. Jetzt chasch denn all Päckli wott bstellt hesch wieder zrugg schickä 
**** Wir freuen uns auf die Ziviltrauung am 04.12.2010 **** Unsere freie Trauung feiern wir am 21.05.2011****
|
nimbini  am 17.10.2010
Re: Nimbini’s Wintermärchen – Polterwoche in Las Vegas
@Belle85, d'idee isch mini gsi, han de film "hangover" mit minere beschte fründin (minere trauzügin) im kino gluegt und wo mir usegloffe sind, hani zu ihre gseit, dass wänn ich emal hürate, mir uf las vegas gönd go poltere! han ihre no gseit und wänn mir nur z'zweite gönd, das seig mer egal... gesagt, getan, es paar mönät spöter hämer tatsächlich agfange hochzyt plane und somit au d'polterwuche in las vegas und us eus zweine sind dänn doch 13 fraue worde, was ich nie im läbe dänkt hetti  planet han eigentlich alles ich, also flüg, hotel, heliflug, show etc (han im reisebüro gschaffet und mach das au suscht total gern) und mini trauzügin hät dänn eifach de polterabig plant und alles buecht....
@vivala, ja gopf, wäred ihr e wuche spöter det gsi, dänn hetti no e 14ti polter-frau debi gha, hihi! han also au es paar mal a dich dänkt det une....
@jenny78, ja hans scho ufgäh gha, dass ich mis chleid fürs zivile findet det une und prompt am zweitletschte tag han ich's dänn no gfunde und au no i minere grössi *freu*! bin uh happy, hett suscht echt no en stress gäh, das chleid innerhalb zwei wuche z'finde ;o)
|
|
Soefeli82 nicht registriert am 18.10.2010
Re: Nimbini’s Wintermärchen – Polterwoche in Las Vegas
Hey nimbini!
tönt würklech nachere supercoole party! Findes cool heiter das so gmacht! tja itzä geits würklech nümme lang bis ig di im "Hochzeit 2010 - Teil 3"-Tread darf üflistä!
LG Soefeli
** Es war einfach traumhaft - 20. & 28. August 2010!!**
|
nimbini am 25.10.2010
Re: Nimbini’s Wintermärchen – Polterwoche in Las Vegas
Hallo @ alli
D'Zyt lauft wie verruckt, hüt inere Wuche isch bereits Eusi Ziviltrauuig  Bin bis jetzt eigentlich rächt ruhig gsi, aber geschter hani dänn emal mis gsamte Outfit fürs Zivile (nur es Chetteli fehlt mer no, aber das chani vonere Bekannte uslehne) aprobiert und bin mega zfriede gsi! Defür hani die Nacht nöd würklich guet gschlafe, mir isch no soooviel durch de Chopf, wo mir bis zu Eusem grosse Tag am 18. Dezember müend erledige.... Fürs zivile müemer hüt nur no s'Menu bstelle! Tja und so hani uh lang nöd chönne ischlafe und dänn hani mega die komische Träum gha wägem Zivilhochzyt... Das hät mer zeigt, dass es würklich langsam ernscht gilt und ich halt doch au langsam aber sicher chli nervös wird!
Was mich au no chli nervös macht isch mis Chleid für de 18.12.! Ich han jetzt 10kg abgnoh, sit ich mis Chleid bstellt han und ich gange devo us, dass mis Chleid erscht Afang Dezember chunnt und ich dänke, dass bis dänn no einigi Kg's meh verschwinde werded.... Jetzt mach mir natürlich mega die Gedanke, ob dänn die mis Chleid würklich eso schön chönd abändere, au wänns dänn halt einigi Grössene werded si! Klar hani mich erkundigt, wo ich's bstellt han und sie händ mer versicheret, es seigi keis Problem, aber wil das ja bis zu de Hochzyt doch en ziemlich grosse Gwichtsverluscht isch, machi mir da scho so chli mini Gedanke, hmmm....
Bin defür am Samschtig no chli i de Wiehnachtsabteilige vo de Läde umgestöberet und bin so richtig is Deko-Fieber cho, han sooooviel lässigi Sache gseh, mit dene mir Eusi Tisch am Fescht chönd dekoriere, han natürlich Eusem Florischt s'Thema "Winterwonderland" scho agäh, muess ihm glaubs mal de Hiwiis gäh, er söll sich au mal chli inspiriere lah vo dene wunderbare Sache, wo jetzt i allne Läde sind! Han so schöni Äst gseh mit Kristall dra, Schneesterne, Kerzehalter mit viiiiel Glitzer und Blingbling..... eifach nur schöööön! Und es bestätigts mir eifach eimal meh, dass mir die Richtig Entscheidig troffe händ, im Winter z'hürate.....
Sorry, han grad mal müesse mini Gedanke chli los werde....
Liebi Grüessli
Nimbini
|
Carmile am 30.10.2010
Re: Nimbini’s Wintermärchen – Polterwoche in Las Vegas
hey nimbini
han gad dini usfüährige gläsä. woooow, so cool. polterwuche in vegas, das hani jo au immer welle und mer hend scho überleit dass mer üsi gäst is mandalay bay iglade hettet und nochher wärs uf cali gange go hürote :-)
und au dini idee mit em wintermärli, tönt sehr schön. bin au sonen fan vo äst und glitzer, so en richtige winterzauber.
lese gspannt mit wie denn dini hochzit wird und wünsch der e schöni restlichi vorbereitigszit, gnüsses!
lg carmile
|
nimbini am 02.11.2010
Re: Nimbini’s Wintermärchen – Unsere Ziviltrauung
Hallo ihr liebe
es isch also würklich passiert, ich ghöre sit geschter au zu de verhüratete frau  allerdings muess ich säge, ich tscheggs irgendwie immer nonig! min maa und ich sind irgendwie die einzige gsi, wo eifach nöd nervös gsi sind, eusi family isch viel meh durch de wind gsi... luschtig!
am sunntig häts agfange mit telefon und sms und glückwünsch und vo ganz viele lüüt, mega herzig! e sehr gueti fründin vo mir hät am abig no glütet mit ihrem fründ und sie isch extra für eus i de chuchi gstande und hät eus en meeeega feine zopf in herzform backe und verbi bracht! han das so e wunderschöni geschte gfunde, en riesige zopf mit ere grosse, rote schleife drum, so herzig! mir händ dänn au wunderbar gschlafe i de letschte nacht vor em zweitgröschte tag und händ am morge de feini zopf gnosse! ich bin dänn uf die 11i zum coiffeur und ich han det scho es chäferfäscht gha mit de coiffeuse... sie hät mer e wunderschöni sissi-frisur gmacht, mit löckli und obe zämegsteckt und links uf de siite offe, rächts hät sie mir so en wunderschöne clip mit türkis und schwarze und pfauefedere inegmacht, ich han de mitbracht, hät so lässig usgseh die frisur (muess luege, obs dänn es paar bilder hät vo minere frisur, han uh freud gha)....
han mich dänn entschiede, dass ich mich sälber tuen schminke, will die passendi schminki hani sowieso dehei und schminke chani mich au selber sehr guet und so bini dänn no rasch was go pöschtele und dänn bini mit mim papi und minere schwöster und mim brüeder no ufs grab vo mim mami! Das isch ganz en furchtbare momänt gsi für mich, ich han furchtbar müesse hüüle, wils mir so weh gmacht hät, dass mis mami a mim grosse tag nöd chan bi mir si und dass sie min maa nie känneglernt hät, isch für mich würklich ganz schwierig gsi! Und trotzdem bini sehr froh gsi, dass mir no rasch ufs grab sind… bin dänn mit richtig verhüülte auge hei cho und han mich mal no rasch müesse sammle, min schatz isch scho nervös gsi… ich? Nei immer nonig, hihi! Han mich dänn in aller rueh schön passend zum chleid gschmink (vioelett), han mich agleit und han mich eifach nur wunderschön gfühlt! Am halbi 3 sind dänn eusi eltere, gschwüsterti mit partner und trauzüge mit partner zu eus cho und min schatz händs no rasch frisiert und ihm kravatte umbunde und dänn simer los richtig wasserschloss hagenwil…. Isch no e stund autofahrt gsi, aber die isch au sehr schnäll verbi gange…. det acho, hät bereits e überraschig uf eus gwartet, mir händ dörfe tuube flüge lah! Wils halt früeh dunkel wird, händ mir das vor de trauuig gmacht, will die tuube im dunkle de heiweg nüme findet…. Mini tuube hät mich no agsch….. hihi! Isch wieder typisch…. Es händ dänn zwar alli gmeint, dass das glück bringt, ja wänn das so isch, dänn lahn ich mich doch gern asch…. Hihi! Uf all fäll isch mini super trauzügin grad zur stell gsi und häts mir putzt ;-)
mir händ dänn no es paar föteli gmacht vor em wunderschöne schloss hagenwil! S’wätter isch ja au total perfekt gsi, wer hetti dänkt, dass mir im november hüratet und wärmer und schöners und wärmers wätter händ als mängi anderi summertäg gsi sind das jahr! Scho e verchehrti welt mängisch! Han mir aber im vorus nöd gross en chopf übers wetter gmacht, es isch mir echt egal gsi, umso schöner isch es natürlich gsi, dass d’sunne mit eus gstrahlt hät….
|
nimbini am 02.11.2010
Re: Nimbini’s Wintermärchen – Unsere Ziviltrauung
Eusi trauuig isch dänn am halbi 5i im grossmuetterstübli vom schloss gsi! Ich han eigentlich scho ghüület, wo eusi zivilstandsbeamtin agfange hät rede, mini trauzügin isch links vo mir ghocket und au ihri auge sind scho mit träne gfüllt gsi (sie hät mir dänn spöter gseit, dass mini gross schwöster scho ghület hät, wo sie s’stübli beträte hät und sie immer mini schwö und mich im blickfeld gha hät, hihi)….. eusi zivilstandsbeamtin hät dänn es churzes päusli gmacht, damit mir eus alli wieder händ chönne sammle und dänn hät sie witergmacht! Sie hät ganz e herzigi trauuig gmacht, hät chli über gschicht vom schloss verzellt und dänn hät sie eus es rezept für e glücklichi ehe vorgläse (mir händ ihre verzellt, dass mir gern chochet und gern ässed und eifach gnüsser sidn) somit hät das rezept wunderbar zu eus passt und sie hät das au uh schön laminiert und eus mitgäh! Ich muess aber ganz ehrlich säge, ich bin au zu dem zytpunkt nöd nervös gsi und ich hans irgendwie immer nonig richtig kapiert, was da abgaht! Han mir immer müesse in chopf rüefe, dass ich hürate, dass das mini trauuig isch, dass mir nachher maa und frau werded si, ganz, ganz es komisches gfühl! Es isch mir eifach würklich wie nöd bewusst gsi, was da überhaupt passiert…. Ja und dänn isch sie langsam zum punkt cho und a sind bi mir natürlich scho wieder tränli gflosse, hihi! Natürlich han ich dänn luut und dütlich ja gseit und min schatz hät grad zweimal ja gseit! Dänn hämer no eusi wunderschöne ring dörfe tuusche ( e langjährigi fründin vo mir hät die für eus gmacht, sie sind en traum)…. Han dänn s’erscht mal müesse mit mim neue name unterschriebe, phuuu isch die unterschrift lang *lach*! De fülli, mit dem mir alli unterschriebe händ, händ mir dänn au dörfe bhalte und wo mich dänn d’standesbeamtin mit em neue name agsproche hät, isch mers irgendwie mal churz bewusst worde! Es isch dänn mit de gratulatione los gange und s’grosse gehüle isch au wieder losgange, min papi, mini schwöster, min brüeder, alli händ sie mich druckt und mit mir ghület, hihi gopf, ich bin eifach so nöch am wasser baut bi so situatione!
Händ dänn im moschtcheller mitenand agstosse und sind dänn spöter im schloss no en feine znacht go gnüsse, hmmmm! Ich han immer wieder müesse min ring aluege und min maa fröge, ob ihm bewusst isch, was da passiert isch und er hät gmeint, ja doch, er tscheggi das langsam würklich, ich muess ehrlich säge, mir isch es hüt nonig ganz bewusst, dass ich jetzt ghüratet bin, komisch, hm (villicht, will alli eus immer säged, mir seiged scho wie es alts ehepäärli, hihi)….. mir händ dänn ganz en luschtige, gmüetliche abig verbracht mit viel lache und schwätze und sind dänn irgendwänn wieder heiwärts gfahre….
De tag isch würklich wunderbar gsi, au wänn ich das alles zerscht mal no muess verarbeite! Hüt morge hämer no dörfe es päckli ufmache, wo mir geschter no per poscht übercho händ, isch en ballon usegfloge „just married“ scho schön, was sich eusi fründe und family so alles ifalle lönd, es isch es schöns gfühl, dass sich alli so mit eus freued! Muess au immer de struuss vo mim zivile aluege…. Ui das hani gar nöd erwähnt, min struss isch soooooo coooool! Ich han ja eigentlich gar keine welle, aber wie das so isch, was meh nöd will, chunnt meh über, hihi….. eigentlich isch es gar kein struss, es isch es hand täschli us silbrigem draht, gfüllt mit efeu und orchidee! Es gseht soooo lässig us, tuen eu dänn no es bildli ine, sobald ich’s han! Han das no nie gseh, e bluemetäsche und es passt soooo perfekt zu mir, hihi! Han mer überleit, dass das eigentlich die perfekti lösig gsi wär für euse grossi tag im dezember, aber möchte natürlich nöd zweimal en ähnliche struss und ich glaube, zum werfe wär de au nöd so ideal gsi *lach*!
Mir händ jetzt no es wücheli ferie und möchted eigentlich no die ganze details für euse grossi tag erledige i dere wuche, so dass mir die letschte wuche no meh oder weniger entspannt chönd verbringe…. Ich dänke, vor em 18. Dezember werded mir dänn au einiges nervöser si, git ja au meh zum organisiere und es werded meh lüüt awesend si und trauuig wird ziemlich sicher au einiges emotionaler…. We’ll see und lönd eus überrasche, was die nächste wuchene no so bringed, als maa und frau…..
|
|
Soefeli82 nicht registriert am 02.11.2010
Re: Nimbini’s Wintermärchen – Polterwoche in Las Vegas
Hei Nimbini
Was für ne schöne Bricht! Merci viiiiel viiiiel mal! Ha geschter dr ganz Tag a öich dänkt! Ig gloube dir isches mit dr Nervosität glich gange wiä mir.
Ig wünsche euch alles Glück vor Wält für öii gmeinsami Zuäkunft!
LG Soefeli
** Es war einfach traumhaft - 20. & 28. August 2010!!**
|
|
|
1 2 3 4 5 .. 13
|
Anmelden
