Liebi nimbini

Ich wünsche eu morn en unvergässliche Tag.
D'Bedingige sind ja perfekt, Schnee hesch definitiv gnueg und Sunne sötts au no gäh

Gnüssed EUE TAG !

Lg Palchen


@-->-- Zivil 20.05.2011 --- Freie Trauung 28.05.2011 --<--@

• Zitieren

Hi Ladies

Die letschti Forum-Hochzyt vom 2010 ghört sit es paar Stunde ebefalls de Vergangeheit a. Natürlich möcht ich’s nöd unterlah, Eu vo Eusem Wintermärli z’brichte, nachdem ich jetzt es Jahr lang aktivi Userin gsi bin i dem tolle Forum und ich mega viel wertvolli Tips und Idee han chönne sammle und ich sogar die eint oder ander Fründschaft han dörfe schlüsse…..

Nachdem ich min Maa au no agsteckt han mit minere Erkältig und mir am Fritig no die letschte Vorbereitige troffe händ, d’Bettmümpfeli is Hotel und Menücharte und Gastgschänkli is Schloss bracht händ, gmüetlich Znachtgässe und es Erchältigsbad gno händ, simer am 11i go schlafe…. Na ja, mir händs zumindest versuecht, am eis hämer eus immer no hin und her gwälzt! Mir händ beidi nöd würklich guet gschlafe, aber trotzdem bini am 6i relativ fit und natürlich unheimlich nervös ufgstande und han mich parat gmacht für de Coiffeur…. Wo ich so allei uf de Strasse gfahre bin durch die wunderbari wissi Landschaft und die schneebedeckte Strasse han ich scho füechti Auge gha, will ich Euses Glück mit dem viele Schnee eifach nöd han chönne fasse…. Klar han ich mir immer viel Schnee gwünscht für Eusi Hochzyt, dass es dänn aber tatsächlich itrifft und dänn no i dere Mengi (bi mir im Unterland sinds gäg die 30cm gsi), das hett ich mir nie träume lah…. No chli zfrüeh bini dänn bim Coiffeur itroffe und es paar Minute spöter isch au mini Trauzügin und Kollegin cho… Händ wieder es Chäferfäscht gha bim Coiffeur und sind dänn nach 1,5 Std mit 10 Minute Verspötig bi de Visagiste itroffe… Au die sind einiges schnäller gsi als bim Probe-Make-up, es hät alles super usgseh und so simer dänn e Viertelstund spöter als plant, aber glichzitig mit em Fotograf bi Eus dehei itroffe…. Min Maa isch bereits e halb Stund vorher mit ere Limousine (Überraschig vo sim Mami) und sim Trauzüüge und de Frau zu de Trauuigslocation gfahre….

Mini Trauzügin hät sich dänn agleit und euse Fotograf hät mis Chleid, Schueh etc gfötelet und ich han min wunderschöne, pinke Bruutstruss entdeckt und dänn hät mer mini Trauzügin i mis Chleid gholfe, ich han min Schmuck agleit, es paar Swarovski-Steinli uf mis Tattoo kläbt und min Birdcage Veil montiert….. Woooow ich bin überwältigt gsi, ich han genau so usgseh, wie ich mir das s’ganze Jahr über vorgstellt han, ich bin eifach nur happy gsi. Mittlerwile sind au min Papi und sini Fründin bi eus itroffe und nachdem ich fertig gsi bin, han ich min Papi is Zimmer gruefe und er hät mich s’erschte Mal dörfe als Bruut gseh! Isch en wunderschöne Momänt gsi für Eus beidi, er hät au so schön usgseh und mir sind eus id Arme gfalle und händ beidi scho zum erschte Mal ghüület, en wunderschöne, intime Momänt…. Mir sind dänn zum Auto und dänn isch irgendöpperem no in Sinn cho, dass min Bruutstruss no i de Stube staht, uffff zum Glück hämer de nöd vegässe, hihi! Min Papi hät Eus dänn zur Trauuig gfahre und chum sind mir los, isch d’Sunne für echo! Mir händ würklich en Traumtag verwütscht, soviel Schnee, dänn no d’Sunne, ich hett würklich nöd dänkt, dass es so perfekt usechunnt. Ich bin allerdings überzügt, dass mir das Wätter mim Mami z’verdanke händ, sit 15 Jahre bin ich de Überzügig, dass sie als Schutzengel über mich wacht und sit ich Sie am Sunntig vor de Hochzyt bäte han, dass sie de Frau Holle hilft Deckene schüttle für Euse grossi Tag, bin ich mir sicher, dass das Traumwätter ihre Verdienscht isch und sie hät mir mit Abstand s’schönste Hochzytsgschänk gmacht und ich bin mir sicher, dass sie de ganzi Tag bi mir gsi isch….

• Zitieren

Nach em 6i händ mir dänn de wunderschön dekorierti Rittersall beträte. De DJ Benz hät de ganzi Saal in iisblau taucht und dänn isch s’Lied „Walking in a Winterwonderland“ gloffe und Eusi Gäscht händ Wundercherzli azündt und mir sind zu Eusem Plätzli gschwebt, eifach perfekt! Händ dänn Eusi Asprach ghaltet und Vorspisebuffet eröffne und so händ mir on time agfange ässe… Zwüsched de Gäng häts mal es Spieli gäh, dänn händ Eusi Trauzügen no de Elvis iflüge lah (in Bezug uf Eusi Las Vegas-Polterwuche natürlich) und mir händ Eus mit Eusne Gäscht unterhalte… Eusi Winterwonderland-Deko isch übrigens absolut traumhaft gsi! Euse Florischt hät das so wunderbracht gmacht, viel schöner als ich’s mir vorgstellt han…. Es hät alles so wunderbar passt, in türkis und silber und wiss… Natürlch mit Schnee und Glitzer! Sobald ich Föteli han, stell ich’s Eu ine….

Nach em feine Ässe händ mir dänn Eusi Stiefeli und Mänteli montiert und dänn händ mir alli zäme en Fackellauf zum Rhiifall gmacht, das isch sooooo mega schön gsi, es isch iisigchalt gsi und alles wiss und mir mit dene Fackle… Bim belüchtete Rhiifall (er isch türkis belüchtet gsi, es hät soooo guet passt) händ mir dänn no Laternli stiege lah, wo Eusi Gäscht Ihri Wünsch für Eus ufgschriebe händ… Im Schnee händ mir dänn no Gruppeföteli mit Eusne gladene Gäscht gmacht…. Wieder im warme Saal isch dänn s’Dessertbuffet bereits parat gstande…. Mit Füürwerk händs Eusi Cupcakes inebracht, wo mir bstellt händ! En etagère und obe druf e chlini torte, alles natürlich in wiss, bruun und türkis und mit Glitzer und mit Schneesterne, es hät super usgseh… und ine die 100 chliine Cupcakes verteilt! Händ dänn Torte agschnitte und d’Champagner-Cascade begosse…. Dänn isch de Hochzytstanz bevor gstande… Da mir en Salsa vorbereitet händ, han ich nöd chönne mit mim Hochzytschleid tanze… Dummerwiis händ mir aber mis Chleid für de Tanz dehei vergässe (das isch übrigens die absolut einzig Panne gsi vom ganze Abig!!!)…. Also sind es paar Fraue im Näbedruum gstande und mir händ hin und her überleit, bis ei Kollegin meint, sie heig doch es Stretch-Chleid a und ich söll doch ihres Chleid alege… gesagt getan, Ihres Chleid isch mer gsässe und sie isch nur mit em Mänteli bekleidet gsi, hihi! Han das so mega gfunde vo Ihre, sie hät würklich Euse Hochzytstanz gretted, eifach mega! D’Lüüt sind begeisteret gsi vo Eusem Salsa und so händ mir langsam alli Gäscht uf Tanzflächig holt und Party hät agfange…. Bis nach em 4i hät en grosse Teil vo Eusere Gsellschaft mit Eus mit gfiiret, bis min Maa dänn gfunde hät, er seig langsam müed und so händ mir s’letschte Lied laufe lah, wo min Maa und ich i de Mitti tanzt händ und Eusi Lüüt en Chreis um Eus ume…. Mega gsi! Und s’Tüpfli uf em i? Wo mir use laufed, häts gschneit, sooooooo schööööön! Überglücklich händ mir eus am 5i dänn is schön gschmückte Hotelzimmer gheie lah und seelig gschlafe, bevor mir dänn Euses Hochzytsfäscht bime feine Brunch im Schloss Laufe mit de restliche Gäscht händ usklinge lah….

Min Maa und ich sind au hüt no hin und weg vo dem absolut perfekte Wintermärli, wo mir händ dörfe erläbe, es isch traumhaft gsi! Mir sind jetzt no e Wuche dehei, werded mit Eusne Liebschte Wiehnachte fiire und Eus uf die bevorstehendi, 4-monatig Hochzytsreis in Asie vorbereite…. Mir sind definitiv überwältig vo allem, agfange bi de Polterwuche in Las Vegas, mit de Ziviltrauuig und mit em meh als perfekte Hochzytstag, wo mir händ dörfe erläbe! Das ganze hät Eus zeigt, wieviel würklich gueti Lüüt mir um Eus ume händ, ich bin so dankbar für das alles…. Und Krönig vo dem Ganze startet bereits nächst Wuche!

• Zitieren

nicht registriert

liebe nimbini

deine winter wonderland traumhochzeit hört sich wirklich an wie ein traum.. mir sind ein paar tränchen runtergelaufen, als ich deinen bericht gelesen habe.. ich freu mich so für dich, dass alles so wunderbar geklappt habt und ihr ein richtig schönes, unvergessliches fest hattet. ich wünsche euch nur das beste und eine wunderschöne hochzeitsreise in asien.. wau, bin grad ein bisschen neidisch.. 4 monate?! wo geht ihr denn überall hin? war schon mehrmals in asien und bin ganz verzaubert von all diesen vielen tollen orten und menschen, die ich kennenlernen durfte.

• Zitieren