Hallo mitenand

etz isch oises Hochzig scho über 4 Wuche her und ich möcht oi gern echli verzelle, wie's gsi isch.

am 31.07.09 hämmer jo die zivili Trauiig gha und am Abig no grilliert bi ois im Garte (im chlinschte Rahme). Mini Coiffeuse isch am Abig no verbii cho go mini Haar iitrülle. het mega lustig uusgseh.

a oisem grosse Tag hämmer zäme z'mörgelet. würkli vill hani nöd möge, will ich scho enorm nervös gsi bin. Mini Trauzügin isch denn cho und mir sind zude Coiffeuse gfahre. sie hät ois denn schön gschminkt und ois frisiert. Ich han en Schleier bis zum Po gha, wo sie mir inegsteckt hät. will mini Trauzügin nöd chan Auto fahre, hani mitm Schleier müesse fahre. läck, d'Lüüt händ amel mega glueget, dass do e Frau mit Schleier aber voll légère aagleit umefahrt. ide Zwüschezyyt hät oise Trauzüüg s'Auto gholt (isch e Überraschig gsi) und min Maa und er sind zu oisere Fotilocation gfahre.

Mir Fraue sind denn au no i oisi Chleider gschlüpft und d'Fotografin het ois denn abgholt und zude Location brocht. Mir sind ufem uu schöne Grundstück gsi, wo's e schöni Garte-Aalag und schöni alti Hüüser und e chlini Kapelle gha hät gsi. Me hät vo det obe wunderschön uf de See abegseh. Kein Mensch isch sust ume gsi. nur mir. und denn händ mir ois endlich gseh. WOW!!! Min Maa isch total chic gsi! Er gseht jo hammermässig us imene Aazug (het er no nie aagha). Mir händ ois nüme welle losloh. Denn hämmer en huufe Föteli gmacht mit de Trauzüge. Die sind denn einisch go d'Gäst begrüesse und mir händ wiitergmacht.

Recht knapp simmer denn abgfahre und wo mir zude Chirche cho sind, händ d'Glogge scho nüme glüte. mir sind dur de Friedhof grennt (isch no schwierig miteme wiite A-Kleid). Vor de Chirche händ ois scho zwei Föteler erwartet. Mir sind id Chirche gloffe und mir sind Träne nuno abegloffe. Sooo vill Lüüt, wo extra wäge ois cho sind. has fascht nöd chöne glaube. oisi Band hät super gspielt, d'Chirche hät wunderbar uusgseh mit de Blueme und Trauig, wo en guete Fründ vo ois gmacht hät isch uuu guet gsi. Mir händ Blueme pflanzet (het zude Predigt passt). isch u witzig gsi. ich im Hochzitskleid mit Händsche und Schoss...

nach de Chirche simmer dur de Spallier und denn händ ois d'Lüüt gad überrent und id Arme gnoh. d'Gratulatione sind u lang gange und vom Apéro hämmer eigentli nünt mitkriegt. es isch jo super Wätter gsi: über 30°. zum Glück häts überall Platane gha, wo Schatte gspändet händ. nach Gruppeföteli und Gspröch simmer denn mitem Cabrio am See entlang zum Restaurant gfahre. d'Autos und Velo's wo entgäge cho sind händ ghuppet und d'Autos vo oisne Gäst sind schön gschmückt gsi.

Will's so schön und warm gsi isch, hämmer chöne verusse gad am See fiire. s'Restaurant (nöd mega gross) isch allei für oises Fescht reserviert gsi. mir händ u guet g'esse, Spieli gmacht, gredt, glacht, g'fötelet am See, etc. Eifach schön gsi! no am halbi 2 isches 22° gsi! irgendwenn sind denn d'Lüüt hei gange und mir sind mitm offene Cabrio hei gfahre.

• Zitieren

denn hämmer all Gschenk id Wohnig abglade und min Maa hät mich natürli über d'Schwelle treit. nachdem mir denn mini 72 Haarnadle us de Haar gnoh händ simmer glücklich is Bett gfalle.

Es isch en wunderschöne Tag gsi und oisi Flitterwuche sind au unvergesslich schön gsi. ich chans mängisch immernanig glaube, dass de (für mich) absolut unglaublich tolli Maa jetzt min Maa isch und ich dörf sini Frau sii!

Ich wünsche allne Brüütli, dass sie au eso en schöne Tag dörfed erlbe und so glücklich dörfed sii, wie mir.

Yasi


Sit em 1. August 2009 glücklichi und stolzi Ehefrau!

• Zitieren

Merci Muggi!

Hei, bi oi isches jetzt denn au bald so wiit. ganz en schöne Tag wünschi oi!

lg Yasi

Sit em 1. August 2009 glücklichi und stolzi Ehefrau!

• Zitieren

Danke für dä schöni Bricht, Yasi! Ich wünsch euch vo Härze alles Gueti.
Liebe Gruess
Kathrin

• Zitieren

Hey Yasi

Naja, bald, nume no 227 Täg... Bis i s Chleid ändlich dörf azieh sogar no 228.

Aber ich freu mich druf, jede Tag.

• Zitieren