guete morge mädels (mittlerwile esch jo scho mittag...)

mi polterobe am fritig esch super genial gse! eg ha immer no mega freud, dass mir sone tolle obe gha hei und mini kollegin sich so müeh geh het. aber jetz vo vore:

am 20 ab 6i esch mi e kollegin deheime cho hole. de si mer ine bar gfahre woni au süsch immer vöu be. dört hei mer eus de aui troffe und hei chli aperölet. eg ha müesse ängelsflügeli und e heiligeschiin alegge. het mega luschtig usgseh. derzue no es wisses shirt (dorum der wissi bh woni ha müesse alegge) wo druffe gstande esch: jetzt noch ein braves ängeli… ab 17. august 2013 eine teuflisch gute ehefrau. mini kolleginne hei aui e vip pass agha amene bändeli und dört esch es fötteli vo mir druffe gse und hinde druffe esch s’programm vom obe gstande. het au super usgseh. so fasch, als wäre si mini bodyguards.

nachem apéro si mer de ines feins italienisches restaurant go znacht ässe. es esch so gmüetlich gse, mer si diräkt über der aare ghocket und hei wunderbar no d’sunne chönne gniesse. traumhaft! dört het de mini kollegin 7 päckli uspackt. vo jedere kollegin esch eis päckli gse. drinne esch e erinnerig verpackt gse vo jedere kollegin und eg ha de müesse usefinde, vo wem das was esch und grad no d’story derzue verzöue. jö so härzig. ha mega freud gha. sone gueti idee! es si de au es paar mega luschtigi storys derbi gse und mir heis extrem luschtig gha. sie hei sich würklech sehr vöu müeh gäh.

plötzlich esch e wildfremde ma mitere rose i der hand vor eusem tisch gstande. er het irgend öppis verzöut vo wäge, ob eg mir das guet überleit heig und nid doch lieber ihn möchti hürote. ha schön müesse lache. ha grad vermuetet, dass mini kollegin äuä e struss rose ufem männer-wc deponiert het mit der bitt, mir e rose verbi zbringe. ha das mou nöime gläse, dass das öpper gmacht het. dorum beni nid ganz so überrascht gse, ha mir aber nüt lo amerke.
es si de no ganz veli verbi cho und hei mir e rose brocht. es esch so luschtig gse und zum teil au ganz härzig. der eint het z.b. gseit: liebi andrea, e überreiche der e rose, für die schönscht frau a däm tisch. so süess! Und einisch esch e chline bueb verbi cho. dä esch erscht öppe 10i gse. er esch ganz schüch a euse tisch gloffe und het d’rose ufe tisch gleit und esch grad wieder gange, ohni eis wort zsäge. jööö, das esch au so süess gse!

nachem feine ässe si mer de witer zoge as stadtfescht. dört het ei kollegin ganz veli shötli uspackt und het sich es trinkspieli usdänkt. aui mini kolleginne hei drü gschichte müesse verzöue. eini dervo esch gloge gse und die andere beide si wohr. eg ha de müesse usefinde, weli das gloge esch. weni richtig grote ha, het kollegin müesse trinke und weni fausch grote ha, han egs müesse trinke. da eg mini kolleginne rächt guet kenne, hani nid ganz so vöu müesse trinke ha aber trotzdem gnue übercho vo eim wo eus dört agsproche het, hani de no e jägermeister spendiert übercho. wähhh, grusig!

mit der zit esch d’stimmig de chli lahm worde. mir hei eus den ntschlossen o es hus witer zgo und si is terminus go tanze. dört si de nümme aui mitcho. mir si de nume no zviert gse. der sound esch leider nid so der hammer gse. der einzig wo würklech es fescht gha het, esch der dj säuber gse. de si mer de gli mou hei. schlussändlich eschs öppe zwöi worde.
alles in allem eschs e super tolle obe gse und mir heis wäuts guet und luschtig gha. genau so hani mer immer e polterobe gwünscht!

• Zitieren

Dandi das tönt nocheme glongne Obig! Cools Programm hend dini Froue för dech usdänkt und das Tshirt das tönt auso ganz heiss! =)

• Zitieren

jöööööööööööööö :D voll herzig

• Zitieren

Der Polterabend hört sich echt super an! Schön, dass ihr es so gut hattet miteinander! :)
Die Ideen, die deine Freundinnen hatten, finde ich echt toll. Könnte man eventuell einmal kopieren. ;)

• Zitieren