Hallo zämme

Ich han es Ziitüberbrückigs Problem. Villicht händ ihr ja no gueti Idee was mer chönnti mache.

Und zwar hürated mir im August standesamtlich im Schloss Rapperswil. Wills in Rappi nöd so viel Parkplätz
hät im Summer händ mirs so organisiert, dass die gladne Gäscht ihres Auto in Pfäffike wos denn s Fäscht isch am Abig chönd parkiere und det werdeds mit Strech-Limousine abgholt und uf Rappi bracht. Mer händ 2 Strech-Limos und die müend aber zum alli 40 Gäst transportiere insgesammt 3x hin und her fahre.
Ich wirde Gäscht denn gstafflet zum abholort bestelle und so werded denn nadisna alli det abgholt. Wills ufem Damm richtig Rappi aber oftmals Stau hät, werded die erschte Gäscht scho ca. 2 Stund vor de Trauuig in Rappi sie damit den alli Pünktlich achömed. Jetzt sind mir eus am überlegge was mer mit dene Gäscht wo denn scho so viel zfrüh det sind chönted mache. Das mer nach de Trauuig scho en grosse Apero händ und vorem Znacht au nomal en chline wett ich nöd nomal en Apero mache. Was gäbtis suscht no für Möglichkeite zum Gäscht echli unterhalte und beschäftige? Händ ihr villicht gueti Idee.

Danke scho mal im vorus

Braut 2015

• Zitieren

Hey Braut 2015

Meinsch nöd, dass egal mit wellem Programm, die 2 Stund vor de Trauuig echli lang sind für die erste Gäst?
Wettsch nöd lieber 3 oder 4 Limousine organisiere, vilicht bimene grössere Limousineservice, und das Problem so löse?

Ich denke ich persönlich würds als Gast scho ziemlich merkwürdig finde, 2 Stund vor de Trauuig scho am Trauuigsort sii und dete d'Ziit totzschlah, dementsprechend no früener scho bim Parkplatz abgholt werde..

Oder gits e Möglichkeit en Parkplatz z'miete scho in Rapperswil (vilicht bimene Buurehof oder ähnlichs) und denn vo det us de Transfer organisiere, so dass es chürzer goht?

Oder vom Gedanke vo de Limousine weg cho und defür en schöne Car (vilicht Oldtimer oder so was) organisiere wo alli mitenand fahre chönd?

Ich chan nur säge dass ich als Gast lieber imene chli unspektakuläre Car zur Trauuig fahre würd, defür nöd 2 Stund ufd Trauuig mues warte, als inere hammer-Limousine.. und bim Rücktransport häsch jo denn vermuetlich nomel s'gliche Problem, dass es sehr lang goht bis alli Gäst denn wieder bim Restaurant sind, oder wiä lösisch das?

Ansuschte wennd debii wettsch bliibe gäbts natürlich d'Möglichkeit es Spiel z'organisiere wo mer die neue Gäst jewiils grad chönt integriere, so kennelernspieli oder so was.. oder en Zauberer wo d'Ziit chli vertriibt bis alli chömed.. Wo wettsch denn d'Gäst warte loh, vor em Schloss? und wo chönds warte wenns zum Bispiel regnet?

Liebs Grüessli
Evass

• Zitieren

Denn würdi vorallem zerscht en Ruum organisiere wo diä Gäst warte chönd, denn chasch Dis Programm de Möglichkeite apasse.. Falls es regne würdi, 2 Stund im Rege stoh wär sicher kein Spass für euri früehste Gäst..

• Zitieren